When We Were Young Festival headline tur MCR leh Paramore

When We Were Young festival kum tawp lama Las Vegas, Nevada-a neih tura headliner tur hming puanzar a ni a, 2000s emo-pop band pahnih My Chemical Romance leh Paramore hming lamrikin a awm tlat mai.

Kumin October 22 hian he festival hi an buatsaih dawn a, Thawhlehni khan headliner turte hming hi an puangzarh a ni. MCR hi chu hripui len hma lawk khan an rawn comeback thawm kan hre tawh a, Paramore erawh tun hi hun eng emaw chen hnua band anga an inlan len hmasak ber tur a ni thung ang.

Paramore hi kum 2018 hnu lamah khan band angin an la inlan ho leh loa, Hayley Williams phei chuan solo album-te hial a tihchhuak tawh a, mahse tunhnai lawk khan an comeback dawn thu a lo sawi lang zeuh tawh a, tunah phei chuan chu chu a chiang lehzual tawh a ni.

When We Were Young festival-a inlan tur band ṭhenkhat hi chuan 90's kids lung a tileng mai thei. Bring me the Horizon, Avril Lavigne, Boys Like Girls, The All American Rejects, the Used leh Atreyu-te pawh inlan tur zingah an tel.