Grammy semna hmun leh hun thar a hriat ta

Rimawi khawvelin a nghahhleh Grammy awards semna hun leh hmun tura ruat thar chu puanzar a ni ta a, April 3 hian Las Vegas-a MGM Grand Garden Arena-ah sem a ni dawn.

Zan dar 8 (E.T) aṭangin en theih turin an pe chhuak dawn a, Trevor Noah bawkin a host leh dawn bakah Fulwell 73 Productions chuan an produce dawn a ni.

Ruahmanna hmasaah kha chuan Los Angeles-ah January 31-a sem tur a ni a, mahse Covid-19 Omicron variant nasa taka a darh tak avangin kumtirah khan Recording Academy lamah chuan award sem hun sawn a nih thu an lo tarlang tawh a, Thawhlehni khan semna hmun leh hun tura ruahmanna thar an siam hi an puangzarh leh ta a ni.

Kumin hi Grammy award an sem vawi 64-na tur ni tawhin, Jon Batiste chuan nomination a hmu tam ber a, 11 lai a hmu. Justin Bieber, Doja Cat leh H.E.R-te chuan pariat ṭheuh an hmu ve bawk.