Hontrade International Ṭhazual Lengzem ; 'Hmangaihna' nen Aziri a inlar

Kumina a music video pakhatna chauh a la ni a, chuti chung chuan a hlawhtlinpui nghal. Kawnpui nula Lalnunziri (Aziri) hian 'Hmangaihna' tih hla hmangin Hontrade International Ṭhazual Lengzem chart thar berah dinhmun sang ber a luah a ni.

Mizo Idol aṭanga mipui hriat hlawh zui ta Aziri hian music video pali a lo siam tawh a, July thla khan 'Hmangaihna' tih hi a tlangzarh leh a ni. He hla hi Lta phuah a ni a, music leh recording hi Thangbawiha kutchhuak niin, video hi Mawitea Hauchhum (RDS) chuan a siamsak thung.

MDM chuan an YouTube channel lamah a hla hi an upload a, Zonet local channel-ah en tur a awm bawk. Local channel lamah chuan lengzem hla thlan hlawh ber a ni mek a, No.1 hauh turin hun a mamawh rei lo hle. Local channel lama thlan a hlawh tluk zet hian YouTube lamah pawh entu a ngah hle.

Aziri hi Ṭhazual chart-ah a mikhual lo hle a, ṭum hnih lai pakhatna a lo hauh tawh. Nikum khan 'Engvangin Nge' music video a tichhuak a, a hlwhtlinpui hle a ni. Chart-ah No.1 a hauh bakah, YouTube-ah pawh viewer nuai khat chuang an awm tawh a ni.

Zorinzuali a inlar
Ṭhazual chart-ah vawi eng emaw zat pakhatna a lo hauh tawh ṭhin a, tun ṭumah pawh a hla thar 'Min hnawl si maw' tih hla nen a rawn inlar leh ta. He hla hi Bibi Hmar phuah niin, pahnihna a nih pui a ni. Zorini hian a music video tihchhuah tawh te chu chart-ah dinhmun sang tak a thlenpui thei zel a, 'Min hnawl si maw' pawh hi No. 1 luah turin a dinhmun a sawhnghet zel.

Sangkimi Khiangte chu a hla hit 'In tel lo chuan' tih hmangin top 3-ah a inhlangkai leh a, thlan hlawh ber zingah a tel. He hla hi pakhatna a lo nihpui tawh a ni a, chart-ah a lang rei ta viau bawk. Josephine Lal­awm­puii chuan 'Duhaisam Di' hla hmangin palina a hauh a, Hlimhlimi chu top 5-ah a lang leh bawk. Hlimhlimi hian 'Ṭhian rinawm' tih hla hmangin min lo awi tawh ṭhin a, a zawna No.1 a lo hauhpui tawh hi a 'hit' takzet.

Tun ṭumah hian top 10-ah Jenny Jathang, David Lalrem­ruata, Marina Vanhriatpuii Varte bakah, Noel Hrahsel leh Zohmaa Pachuau te an lang bawk.

Hontrade International Ṭhazual Lengzem Top 10
1. Aziri - Hmangaihna
2. Zorinzuali Khiangte - Min hnawl si maw
3. Sangkimi Khiangte - In tel lo chuan
4. Josephine Lalawmpuii - Duhaisam Di
5. Hlimhlimi - Ṭhian rinawm
6. Jenny Jathang - Tuarthiam rawh aw
7. Marina V. Varte - All In
8. David - Jerusah
9. Noel Hrahsel - Aw 'D'
10. Zohmaa Pachuau - Zun leng di i zun