Top 11 intihsiak hun a thleng ta Zonuni a inlar leh dawn!
Mizo Idol Season 6 intihsiah chu zaninah chhunzawm a nih leh tawh dawn a, top 11 te an inlan ang. Top 11 intihsiak aṭang hian host thar kan hmu dawn a, chu chu Mizo Idol host ṭhin Zonunsangi Fanai (Zonuni) a ni.
Top 11 intihsiak hi College of Veterinary Sciences and Animal Husbandry auditorium, Selesih-ah neih tur a ni a, Zonet Zawlbuk-ah live-a pekchhuah leh a ni ang.
Zanin leh Zirtawpni zanah intihsiak hi neih a ni ang a, Zirtawpni zanah result puan a ni ang.
Top 11 aṭang hian contestant te zai hi Zonet YouTube Channel, Mizoram Idol Facebook Page leh Mizo Idol Instagram account-ah post ṭhin a ni dawn a, heng account-a thlirtu (viewer) nei tam hian judge-te thuthlukna a pui thei dawn a ni.
Live music & track
Zanin aṭang chuan contastant te an inlan nghal vek tawh dawn a, inbuatsaihna an neih chen pawh a inrual viau dawn a ni. Musician ṭha tak tak hnuaiah an inbuatsaih a, zaninah an theihna tak tak an phochuak dawn. Inbuatsaihna pawh an neih ngawrh hle a, show a hlu leh zual dawn.
Top 11 intihsiak hi zan hnih neih a ni dawn a, zanin leh Zirtawpni zanah te neih a ni ang. Zirtawpni zan hian intihsiak bakah, result puan a ni ang a, top 5 lut a hriat dawn a ni. Zanin bik hi live music a ni dawn a, Zirtawpni zanah erawh track an hmang thung dawn a ni.
Contestant te chet ṭhat dan azirin mi panga aia tam pawh an la tling chho thei tura ngaih a ni.
Zonuni nen aw!
Mizo Idol en ṭhinte chuan a thiam zia leh show tihmuhnawmtu zinga mi a nih zia kan hre ṭheuhin a rinawm. Mizo Idol 'ti Idol-tu' tia an sawi ṭhin Zonuni ngei mai kha zanin aṭangin kan hmu leh tawh dawn a, hmaih phal chi a ni lo.
Zonuni hi Mizo Idol Season 6-a host pathumna tur a ni dawn a, a hma hian Serchhip nula Lancy Remlalhruaii leh Drew Pachuau te an lo inlan tawh bawk.
Intihsiak boruak sangah Zonuni a inlan tur hi chanchin lawmawm tak a ni a, show tihmuhnawm zualtu a nih ngei a beisei awm.
Mizo zingah chuan sulhnu nei ṭha berte zinga mi niin, tun thlengin Idol host tura mipui duh rawn ber pakhat a la ni.