Justin Bieber & Hailey Baldwin an inhual hnua a vawi khat nan Hailey Baldwin ṭawngchhuak

Justin Bieber leh Hailey Baldwin te inhual thuin khawvel a dengchhuak a, titi pawh a tam phah hle. Hetih lai hian an mahni lam an ṭawngchhuak meuh lo a, Hailey Baldwin chuan an inhual chungchang hi tun hnai khan a sawichhuak ve ta a ni.

American model Baldwin chuan, "A hlimawm tak zet a ni, sawisel tawk awm bawk mah se harsatna ka neih phah lo," tiin a sawi. Baldwin hi tun hnai khan Australian Magazine lar Stellar chuan an interview-a an inhual chungchang hi a vawikhat nan a sawi chhuak a ni.

Kum 21 mi Baldwin chuan, "Justin Bieber nena kan inhual chungchangah hian thuthang a tam hle a, sawiselna pawh ka dawng hnem hle a ni. Mi dang nen khaikhin ka ni a, mahse heng zawng zawng hi hriat vek ka duh lo a, a ṭulna pawh awmin ka hre lo," tiin, JB-a bialnu hlui Selena Gomez nena an khaikhin ṭhin chu ngaihtlahsak a tum loh thu a sawi.

Canadian singer Justin Bieber leh American model Hailey Baldwin te hian inneih an tum hnai niin tarlan a awm fo a, thu chiang erawh a la awm rih lo a ni.