MAXIM Magazine-ah Mizo photographer kutchhuak

UK-a hmunpui nei, khawvel ram hrang hranga inzar pharh MAXIM Magazine hi tunlai magazine chhuakah chuan a lar ber te zinga mi a ni ngei ang. India ramah pawh kan milar ber ber ten inphochhuahna tlaka an ngaih a ni a, chu magazine-ah ngei chuan Mizo photographer Johny Ngurthansanga leh Tetea Ralte te thlalak pholan a ni.

MAXIM hian an issue thar bera 'Travel' huang bikah Mizoram chanchin an tarlang a, thupuiah 'The Mizoram You Need To See' tih an hmang. He article-ah hian Mizoram-a khualzinte hiplut thei hmun hmingthang hrang hrang chu a thlalak nen tarlan a ni. State Museum te, Sialsuk tlang, Vantawng khawhthla, Tuirihiau, Durtlang leh Reiek tlang bakah, hmun hming thang dang chanchin an ziak a, thlalak pawh panga lai an tarlang a ni.

Chung thlalak te chu Mizo zinga photographer kan neih ṭhat ber pawl Johny Ngurthansanga leh Tetea Ralte te kutchhuak a ni a, Johny-a thlalak pathum lai a lang.

Hei hi chanchin lawmawm tak a ni a, talent nei ṭha tak tak te inphochhuahna remchang a nih bakah, khuanzin ten Mizoram an rawn tlawh chakna tura kawng pawimawh tak a ni. Mizo zingah magazine leh newspaper lian tak tak te agent an awm ta nual a, hei pawh hi hmasawnna ropui tak a ni.

Ram dangten hmasawnna rahbi chak taka an pen rual a, ke kan lo pen ve zela hma kan sawn deuh deuh theih nan kan ram leilung mawi danglam tak khawvel hmuha phochhuah hi kan zavaia mawhphurhna a ni.