Eminem-a'n record a siam nghal

American rapper Emi­nem chuan mi bik a nih zia a pholang leh ta a, U.K. Albums Chart-ah No.1 a hauh nghal. Chart-ah hian ṭum kua zet No.1 a hauhna a ni a, record a siam hial a ni.

Eminem hian kar liamta khan sawi lawk lem loin album thar 'Kamikaze' a tlangzarh a, a hit nghal hle. UK-ah chuan album hralh kal ber a ni mek a, Led Zeppelin leh ABBA te record lo siam tawh chu a khum a ni. English rock band Led Zeppelin leh Swedish pop group ABBA te chuan ṭum riat No.1 an lo hauh tawh a, hei hi Eminem hian a rawn khum ta chiah a ni.

Hla 13 awmna 'Kami­kaze' hi nikuma a tichhuah 'Revival' hnua a album hmasa ber a ni a, chart hrang hrangah a invawrh sang chak hle a ni.