Manager thar zawng mek Olivia Rodrigo

Olivia Rodrigo chuan manager thar a zawng mek niin Billboard chuan nimin khan an tarlang.

Kum 18 mi lek ni chunga rimawi khawvel al hneh tak Olivia Rodrigo leh a manager Camp Far West Management founder Kristen Smith-te chuan thla tir lamah khan an thawhdunna an titawp niin an tarlang a, chumi a nih avang chuan 'Driver License' hitmaker hian Kristen Smith thlaktu a zawng mek a ni.

Billboard chuan hemi chungchang hi tarlang mah se, Rodrigo thupuangtu emaw Smith emaw hian engmah an la sawi chiang lo thung.

Olivia Rodrigo hi rimawi khawvelin a hmelhriat hma khan High School Musical series-ah changin, nikum January 8 khan a single hmasa ber 'Drivers License' chu tlangzarhin; chu hla hmang chuan khawvel a deng chhuak nghal a ni. Spotify leh Apple music lamah record a break bakah a hla hmasa ber mah nise Billboard Hot 100 chart lamah pawh No.1 hialte a ni nghal.

Kristen Smith nen an thawhdunna hnuaiah hian kum khat chhung lekin Rodrigo hian record ṭha tak tak a nei hman a, a album hmasa ber 'SOUR' chu nikum May thla khan tlangzarhin Billboard 200 chart-ah kar nga chhung (a záwn ni loin) pakhatna a nihpui thei a, nikum chhunga album hit ber pawl a ni. Kumina Grammy award sem turah hian category pasarih laiah a hming a lang a, chung zingah chuan Big Four categories: record, album leh song of the year bakah best new artist-te pawh a tel hial! Billie Eilish tih lohah chuan heng category lian palia nominee a ruala ni vek thei naupang ber a ni bawk.