Amazon lama chhuak tur ‘Lord of the Rings’ title chu...

Amazon Prime chuan kumin chawhnu lama an tihchhuah tur ‘Lord of the Rings’ title chu an puangzar ta a, 'The Lord of the Rings: The Rings of Power' tih a ni dawn.

Nilaini zanah khan Amazon Prime hian video tawite hmangin ‘Lord of the Rings’ series title hi an puangzar a ni.

‘Lord of the Rings’ fan-te'n an nghahhleh tawh tak 'The Lord of the Rings: The Rings of Power' hi September 2 aṭangin an pe chhuak ṭan dawn a, kartin episode pakhat zel an tichhuak ang. Nikum August thlatirah khan an chang zo vek tawh a, season 2 pawh Amazon hian chhunzawm turin an commission fel leh tawh niin Variety chuan an tarlang.

He series hi Lord of the Rings khawvela Second Age hunlaia thil thleng angin an chang dawn tih puanzar a lo ni tawh a, Sauron-in Rings of Power an chher lai hun vel angin an chang dawn a ni.