'Moon Knight' star Gaspard Ulliel a thi

Marvel-in an series tihchhuah thar tur 'Moon Knight'-a changtu zinga mi France lemchan thiam Gaspard Ulliel chu kum 37 mi niin Nilaini khan a thi.

Gaspard Ulliel hi March 30 aṭanga tihchhuah ṭan tur mi tam takin an en chak tawh 'Moon Knight' series-ah Anton Mogart lemah a chang a, Hannibal Rising film-ahte pawh khan lo inlan tawhin France film-ah phei chuan channa a nei ngah hle.

Nilaini khan a chhungte chuan Gaspard Ulliel thih thu hi an puangzar a, Alps-a vur an tlengnaah a chetsual vangin a thi niin an sawi. Thawhlehni khan Savoie region-a vura an tlengnaah midang nen insuin a thluak a tihnat avangin Grenoble lamah damdawi-inah an hruai a, a tukah a thi ta a ni.