Box Office ; Sum lalut hnem ber 'Crazy Rich Asians'

Drama/Comedy film 'Crazy Rich Asians' chu North American Box Office-a sum lalut hnem ber a ni a, a zawna dinhmun sang ber a luah ṭum thumna a ni ta.

Crazy Rich Asians hian kar liamta chhung khan $mtd 21 a lalut leh a, khum thei an la awm lo. Malaysian actor Henry Golding leh American actress Constance Wu te chandunna film hi tlangzarh hun a fuh hle a, sum lakluh kawngah pawh a che ṭha hle. Box Office-ah ṭum thum zet a zawnin pakhatna a hauh tawh a, $mtd 137.2 zet a lalut tawh a ni.

'The Meg' chu sum lalut tam pahnihna a ni a, $mtd 10 a lalut. August 10-a tlangzarh 'The Meg' hian US leh Canada aṭang ringawtin $mtd 462.8 zet a lalut tawh a, Box Office-ah a che ṭha rih hle. Tom Cruise channa 'Mission: Impossible – Fallout' chu sum lalut tam pathumna niin, $mtd 7 a lalut ve bawk.

American actor Tom Cruise channa film hi North America-ah hralh a kal hle a, a sum thawhchhuah tawh zawng zawng chu $mtd 552.5 zet a tling tawh a ni.

January thlaa tihchhuah Searching leh Operation Finale te chu top 5-ah an lang a, an sum lakluh zat chu $mtd 6.2 leh $mtd 6 a ni. Disney's Christopher Robin chu sum lalut tam zingah a tel phak a, Alpha leh The Happytime Murders te chu an langsar viau bawk. Top 10-ah hian BlacKkKlansman leh Mile 22 te chu an lang ve bawk.