Beckham chhungkua an hlim

Tun hnaiah sawi neuh neuh a tam a, inṭhen mai tur ang hiala sawi tawk lah an bo lo. Hetianga boruak a awm mek lai hian Victoria Beckham chuan chhungkaw hlim tak leh inpum khat ṭhat tak an nih thu a sawi.

Beckham chhungkua hi Vogue (British) Magazine chuan October issue cover atan an hmang dawn a, an chhungkaw chanchin pawh chhiar tur a awm dawn. Vogue-in an kawm ṭum hian Victoria Beckham chuan, "David nen hian pumkhat kan ni a, a hranga kan awm aiin thil kan tithei zawk a ni. Kum 20 vel zet chu kan chanchin hian sawi a lo hlawh tawh a, tun thlengin sawi duh tawk an la awm reng a ni. Mi thusawi hi a tak a ni lo tih inhria ang chu," tiin, nupa inkawp rem tak an nih thu a sawi.

Victoria Caroline Beck­ham chuan sawi zawmin, "Kan chungchang hi sawi chhuah fo ka tum lo, ka eizawnna - kan thil siam chhuah, customer leh social media channel te hi a pawimawh zawk chu a ni," tiin, a sumdawnna a ngaipawimawh thu a sawi. Chutih rual chuan chungkaw hlim tak an nih thu a sawi uar hle a, a pasal fanaute nen chhungkaw hlim tak an nih thu a sawi bawk.

Vogue Magazine chuan Thawhehni khan October cover tur hi an tlangzarh a, Victoria leh David Beckham bakah an fate pali- Brooklyn (19), Romeo (16), Cruz (13) leh kum sarih mi Harper te nen anlang a ni.