Mizo Idol 2018 ; Zaninah music track nen intihsiak leh dawn Top 5 lut tur chinfel zan!

Nilaini zan khan top 11 intihsiak zan khatna neih a ni a, zaninah chhunzawm a ni ang. Zaninah hian music track nen an zai dawn a, top 5 lut tur tih chian nghal a ni ang.

Zan khatna chu
Mizo Idol ni thei tur mi 11 te chu Nilaini zan khan live music nen an intihsiak ta a, boruak a hot nghal hle. Zemabawk nula Immanuel Lalawmpuii (Teawmi) chuan Lalrindiki Khiangte hla sak ṭhin 'Mahse maw' tih hla ngei mai hmangin bul a ṭan a, a khuh hawng ṭha tak zet. A hnu leha zai huphurhawm khawpin a zai ṭha a, judge te pawhin an fak hle a ni. Teawmi hian top 25 intihsiakah khan

Kolasib Vengthar nula Mal­sawm­dawngkimi (Dawngkimi) chu pahnihnaah a zai a, Rev. ZR Sanga hla lehlin mawi takin a sa. Dawngkimi hian Mizo leh sap hla mawi takin a sak pawlh a, a talent ṭhat zia a phochhuak chiang hle. Judge zinga mi Robin Lalremruata chuan, "I zai pui rem rem hle mai," tiin a comment a, a perform ṭha hle.

Dawngkimi zai zawh hian Peter Lalnunpuia (Petera) a ding chhuak ve leh a, zaithiam bik a nih zia hmuh hmaih rual a ni lo. Chanmari West tlangval Peter-a hian 'An ral leh ṭhin' tih hla hnehsawh fahranin a sa a, a aw ṭhat zia a pholang.

'Zo James Blunt' an tih mai Andrew K. Lalchhandama chuan 'Ngaihlai ka bang lo'ng che' tih hla a sa ve thung a, ṭum dang a pha chiah lo niin a lang. Aw sin leh thum hmang thiam tak Darlawn tlangval Andrew tan Idol nih theihna kawng a la bo lo a, zanina a chet ṭhatin kawngro thui tak a su thei dawn a ni.

Pangzawl tlangval cool tak mai Jonathan Lalengzauva chu ṭum dang ang bawkin a che ṭha leh pek hle a, mipui mitfukna a ni. Jonathana hian 'I tan ka hmangaihna' tih hla chu mawi fahranin a rawn thlawh leh a, Idol a nih pawhin a mak lo ang! Endiktute pawhin 'Teh thlap thlap ang maiin i zai, i khabe i thlahdah lo," tiin, a zaiah a rilru a pek thu leh a thu lam a fiah ṭhat thu an sawi. Jonathana hi Mizo Idol Season 6-a 'Leikapui Style' larpui thei awmchhun a ni a, a talent nei ṭhat hi dinchhuahpui tham a ni.

'Ka chul zo ta' tih hla nen Chawnpui nula R. Lalmalsawmi a ding chhuak ve leh a, ṭum dang a pha lo deuh niin a lang. Dam sam vak lo chunga zai a nih vangin top 5-ah a inhlangkai zo angem tih chu zawhna a ni a, zanina a chet ṭhat leh ṭhat lohin a hma hun a tichiang ang. Sawmtei zai zawh hian Morris Hauliena a zai a, 'Zoram ṭang fan fan' tih hla a sa. Moris-a hi Mizoram pawn aṭanga la dam awm chhun a ni a, Mizo Idol intihsiakah tel zui zel turin a thiam tawk em tih chu zaninah a chiang dawn.

Chanmari fachuam Jerry Lalrinawma chuan Tetei Ralte hla 'Rinawmin' tih chu mawi takin a sa a, a perform pawh a hmuhnawm hle. Jerry-a hi live band chhawr ṭangkai ber zinga mi a ni a, zanina a chet ṭhat chuan top 5 kai thei tur zinga mi a ni.

Champhai nula H. Lalnun­siami (Mami) chuan 'Aw Isua a ni' tih hla hmangin mipui hmaah a theihna a pholang a, a theihna tak tak a pholang ṭan ta. A zai a nung a a hla thuah a cheng bawk a, perform ṭha ber te zinga mi a ni. Mami zai zawh hian tun ṭum Idol-a boruak nei lian tak Ticos Darhmingliana a dingchhuak ve leh a, Vulmawi ho hla Israel Lalbiakrema sak ṭhin 'Hmangaihna' tih hla a sa. Chhinga veng tlangval Ticos-a hi ṭum dang ang bawkin cool takin a perform leh a, mipui ṭan rawn a ni zui thei zel dawn em tih chu zaninah fiahin a awm ang.

Top 11 intihsiak zan khat­naah hian Ruallung nula Lalduhawmi chuan hnu a khar a, Daduhi hla satu zingah a tel. Awmawmi hian 'Lalpa ka rawn pan che' tih hla a sa a, endiktute a hmin zo em tih result puan hunah a hriat ang.

Top 5 lut tur a chiang lo
Contestant te hi zaninah music track nen an intihsiak leh dawn a, zan hmasa lama beisei phak chiah lo tan pawh insiam ṭhatna hun a ni. Zan khatnaah live music nen an intihsiakk a, zaninah chuan music track an hmang ve thung dawn. Zan hnih an intihsiak result hi belhkhawm a ni ang a, top 5 lut tur a chiang dawn.

Tunah rih chuan top 5 lut chiang tia sawi theih an la awm lo a, zaninah engkim chinfel a ni ang. Inthihsiak a awm phawt ang a, chumi zawhah result puanin a zui dawn a ni. Mizo Idol Season 6 hi Zonet Zawlbuk-ah live-a pek chhuah a ni a, internet kaltlangin a en theih bawk.