Hillsong UNITED-in hla thar 'On Repeat' tichhuak

Hillsong United chuan Zirtawpni liam ta khan hla thar 'On Repeat' an tichhuak.

Worship rimawi lama hmahruaitu nia chhal ngam Hillsong hla thar hi Joel Houston, Ben Fielding, Benjamin Hastings, leh Aodhan King-te phuah niin hla nung tak, Pathian ṭhatna leh kan chunga a rinawmna fakna hla ṭha tak a ni a, streaming platform lamah duh hun huna ngaihthlak theiha awm tawhin; Worship hla ngainatute tan chuan ngaihven chi tak a ni.

Hillsong hian an hla thar hi audio mai bakah lyric video nen an tichhuak a, Joel Houston chuan," Kan nunah hian zahngaihna hi kan dawng tel reng a, chuvang chuan Pathian zahngaihna kan chhanletna tur hian Amah fakna hi 'repeat' a ni tur a ni...A zahngaihna kan dawng leh dawn a ni tih ka hriat avangin fakna ka hlan dawn a ni," tiin YouTube-ah lyric video an dahah chuan a ziak tel.

Kumin hian Hillsong leh Chris Tomlin-te chuan Tomlin UNITED 2022 tour an nei dawn a, US hmun hrang hrangah tour hi an nei ang.

Hillsong kohhrana youth ministry peng pakhat atana kum 1998-a din Hillsong United hi khawvela worship band lar leh Pathianin a hman ber zinga mi an ni a, live album 14 leh studio album panga an tlangzarh tawh a ni. An hlate chu khawvela Kohhran hrang hrangin an sak tam ber pawl ni chho deuh char charin ṭawng hrang hrangin an letling nasa ṭhin hle. Dove award 10 chuang an dawn tawh bakah khawvel ram hrang hrangah album copy maktaduai chuang fe an hralh tawh bawk a ni.