Gospel music news ; Elevation Worship single thar 'Same God'

Contemporary worship band Elevation Worship chuan Zirtawpni liam ta khan single thar 'Same God' an tichhuak.

North Carolina-a Elevation Kohhran chhuak worship band hla thar 'Same God' hi March 4-a an tihchhuah tur 'LION' album aṭanga an single hmasa ber a ni a, Gospel rimawi huangchhunga hming langsar tak tak- Steven Furtick, Chris Brown, Brandon Lake, leh Pat Barrett-te phuah niin Pathian rinawmna puanchhuahna hla a ni.

Kum hnih liam ta chhung khan rimawi khawvelah Elevation Worship hian lawm an hlawh zual hle a, kumina Grammy award sem turah pawh hian nominee niin nikum khan Billboard Music Award pahnih- Top Christian Artist leh Top Christian Song-te an la a, Dove award pali lai an hum haw bawk.

March thlaa an album tlangzarh tur hi an album 14-na tur a ni tawh a, hla awm turte pawh puanzar tawhin Christian music artist lar tak tak an thawhpui a ni.