One In Christ hla thar 'Lalpa ka chhuang che'

One in Christ-te chuan kumina an music video palina tur leh an project lian ber 'Lalpa ka chhuang che' tih chu an ti chhuak leh dawn ta.

He hla Lalliani phuah a ni a, recording leh music hi Studio A-16 te kutchhuak a ni thung. 'Lalpa ka chhuang che' tih hla hi Believing.is.Seeing Project siam sak niin, Raymond Colney chuan video hi a direct sak bawk.

Raymond Colney hian a concept leh story pawh a a buaipui sak a, pre-production mumal tak a siam sak bawk a ni.

One In Christ music video thar hi kan la hmuh ngai zen zen loh a ni dawn a, a hmuhnawm hle tura ngaih a ni. Mizorama a vawikhat nan Operation Theatre-ah shooting neih a ni a, a dangdai viau dawn. One In Christ leader Alvin-a chuan, "Mi zai (surgery) tur an tam avangin darkar thum chhungin shooting zawh a ngai a, inbuatsaihna a hautak hle a, Greenwood Hospital OT-a thawk te chungah lawmthu kan sawi mawlh mawlh a ni," tiin, mipui hmuh tur music video dangdai tak an siam hautak zia a sawi.

A video kal hmang hi - hmeichhe pakhat thi tawh mai tur, zai a nih hma lawka Pathian nena hla hmanga inpawla, hlimna chang chho ta vel a ni. Hnimhlum an pek hnu chuan suangtuahna khawvelah a cheng ta a, hlim takin a zái tu te nen chuan Pathian fakin an lo zai ho ta a ni. A tak ramah erawh chuan doctor te leh nurse te chuan theihtawpin a nun chhan tumin an lo buai mup mup mai a, mahse a thlarau chu Pathian hnenah thlamuang takin a chawl ta a ni.

One In Christ hla thar hi zanin hian Zonet-ah tihchhuah tum a ni.