Lana Del Rey Dodalna avangin Israel-ah a perform leh dawn lo
A tir phat aṭang rengin dodalna leh sawiselna a nasa a, a tawpa tawpah chuan amah pawh a inhnuk dawn ta niin a lang. American singer Lana Del Rey chuan dodalna nasa tak a tawh avangin tun thlaa Israel-a Meteor Festival-a a inlan tur chu a ṭhulh niin khawthlang media te chuan an tarlang.
Hemi chunghang hi kar liama Zirtawpni aṭang khan a darh a, titi pawh a titam hle. Lana Del Rey chuan, "Israeli leh Palestinian te, inkianga ka hun hman tur chu sawn hlat a ngai dawn ta a ni," tiin Twitter lamah a tarlang. Meteor Festival-a a inlan ṭhulh a nih chhan hi politics vang a ni pakhat a, Israel a tlawh tur hian dodal a tawk nasa hle a ni.
Fan te ngenna vang maw?
Lana Del Rey hi fan leh activist tam takin an dodal a, an ram tlawh lo turin an ngen. A chhan ber pawh an inkarah buaina nasa zawk a chhuah an hlau a ni. Hei hi Del Rey pawhin zah sakin thla hmasa lawka Israel a tlawh tur thu a lo puan tawh chu a a cancel leh ta zawk a ni.
Lana Del Rey chuan, "Palestine leh Israel-a ka fans te chu angkhat vekin a ka en a, an kianga hun hman ka chak hle a ni. Mahse vanduai thlak takin tunah rih chuan an kianga hun hman a rem rih lo a ni. Engtik niah emaw chuan in kiangah hian hun ka la hmang ngei ang," tiin a sawi. Israel tlawh tura ruahmanna a lo siam tawha politics a inrawlh loh thu a sawi tel bawk.
Palestinian campaign pawl pakhat Academic and Cultural Boycott of Israel (Pacbi) chuan Del Rey thutlukna hi lawmawm an tih thu an lo sawi ve mek bawk.
Israel tlawh a him lo!
Israel leh Palestinian te hi Gaza Strip chungchangah an buai nasa hle a, ram hrang hrang sorkar lu pawh an tihai hle a ni. Milar tam takin Israel tlawh a him lo tih an hria a, pumpelhna kawng an zawng ṭhin. Chung karah cuan boruak ṭha a thlen beiseia tlawh tum an awm bawk a, mahse a tawp khawkah chuan an ṭulh leh nge nge ṭhin. Del Rey pawh hian kum 2014 khan Israel-a show a neih tur chu a lo ṭulh phah tawh bawk.
Artists zingah Lorde leh Radiohead te chu Israel-a perform tura harsatna lo tawk tawh zingah an tel bawk. New Zealand singer Lorde hian fans te hnen aṭnga Israel-a kal lo tura ngenna lehkha a dawn hnuah a tum a ṭhulh leh ta a ni.