Ana De Armas 'fan' pahnihin Universal an khing

Cuban-Spanish actress Ana de Armas fan pahnih chuan 'Yesterday' film-a Ana de Armas inlanna scene paih a nih avangin Hollywood studio Universal Pictures an khing.

'Knives-Out' actress fan pahnih- Conor Woulfe leh Peter Rosza-te chuan trailer-a Ana De Armas a lan avangin film chu an hawh tih an sawi a, $3.99 ve ve sengin film an hawh a, mahse an hmuh duh ber chu a lang ta si loa, chumi avang chuan Universal Pictures lam chu an khing ta a ni.

He film en tawhtute zawng zawnga nghawng a neih tawh avangin $maktaduai 5 lai zangna-dawmna an phut nghe nghe a, hetihlai hian Universal Pictures lam chuan hemi chungchangah hian engmah an la sawi lo thung.

Hollywood Reporter-in a tarlan dan chuan kar hmasa Zirtawpni khan California-ah Universal Pictures khinna hi an thehlut a, thubuai thehluttute chuan film trailer-ah De Armas chu lang mah se film an tlangzarh hnuah a hmel reng reng hmuh tur a awm ta lo chu 'Yesterday' film enna tur atana midang hipna atan Armas chu an hmang mai niin an sawi.

'Yesterday' film hi kum 2019-a tlangzarh daih tawh kha a ni a, zaithiam pakhat, chetsualna tenau tawk, chumi hnua khawvela Beatles hretu awmchhun a nih dan vel a ni.