Mizo Idol 2018 ; Mizo Idol ni thei mi paruk chiah an awm ta ; Andrew - Morris - Sawmi - Awmawmi leh Petera te an liam
Kar kal ta Zirtawpni zan khan Mizo Idol Season 6-a intihsiak hmachhawn zui zel thei tur chinfel a ni a, Ticos Darhmingliana, Jonathan Lalengzauva, Immanuel Lalawmpuii, Malsawmdawngkimi, H. Lalnunsiami leh Jerry Lalrinawma-te an tling.
Hetih lai hian Andrew K. Lalchhandama, Morris Haulien-a, R. Lalmalsawmi, Lalduhawmi leh Peter Lalnunpuia te erawh an zinkawng a tawp ta a ni.
Top 6 chu
Top 11 inthisiak hi zan hnih neih a ni a - Ticos, Jonathan, Dawngkimi, Teawmi, Jerry leh Champhai nula Mami-te chu Idol zinkawng zawh zui zel turin an tling. A tirah top 5 thlan tura ruahman ni mahse contestant an ṭha tlang a, endiktu lamin mi paruk an titling ta zawk a ni.
A tirah Zemabawk nula Teawmi chu tling zingah a tel lo a, tla tawh tura ngaih a ni hman. Mahse judge-te'n a tlin thu an puang leh ta zawk a, thawm a ṭha kher mai. A hmelah lawmna hmuh tur a awm a, host Zonuni Fanai nen pawh an inkuah chawn chawn a ni.
Van a duai chuang e!
Mizo Idol Season 6-ah tel an ṭhahnem a, top 11 inhlangkai chinte phei hi chu thiam tak tak vek an ni. Intihsiak a nih miau avangin vanduai an awm a ngai a, top 6 aṭang pawhin an la inthlifim leh dawn a ni.
Darlawn tlangval Andrew K. Lalchhandama zaithiam zia inhrilh nawn a ngai lo a, a aw mawi dangdai tak hmangin Zoram mipui min awi zui zelin a rinawm. Manipur aṭanga Mizo Idol top 11-a inhlangkai thei Morris Haulien-a pawhin Mizo Idol-ah a theihna san zia a pho chhuak tawh a, mipui mit fuk zuina tur pakhat a ni.
Chawnpui nula R. Lalmalsawmi hi a tir aṭanga boruak nei lian zinga mi a ni a, a lar zui zel theih pawh a rinawm. A aw mawi tak chu Zoram mipuiin ngaithlak an la kham lo a, music video hmanga a invawrh lar zui a nih pawhin a mak lo ang.
Ruallung nula Lalduhawmi'n mipui ngainat a hlawh a, ṭantu pawh a ngah hle. Idol-a a zinkawng tawp tawh mah se hriat hlawh zui tur zinga mi a ni a, a lakah beiseina pawh a sang hle.
Chanmari West tlangval Peter-a talent neih ṭhat zia hai rual a ni lo a, Mizo mipui zaia awi zui zel tur zinga mi a ni. Idol star dangte ang bawka rimawi khawvela hriat hlawh zui tur zinga mi a ni.
Mizo Idol Season 6 - Top 6
Ticos Darhmingliana - Chhinga Veng
Jonathan Lalengzauva - Pangzawl
Malsawmdawngkimi - Kolasib
Immanuel Lalawmpuii - Zemabawk
Jerry Lalrinawma - Chanmari
H. Lalnunsiami - Champhai