Spencer Princess of Wales lemah Kristen Stewart

Twilight star Kristen Stewart chu film thar tur 'Spencer'-ah Princess of Wales Lady Diana lemah a chang dawn a, inremna pawh an ziak tawh niin director Pablo Larrain chuan a sawi.

Peaky Blinders creator Steven Knight chuan script a ziak dawn niin an sawi a, kum 1990 chho vel hunlai anga chan tur niin Sandringham leh a chhehvela thil thleng an lantir dawn niawm tak a ni. Diana-i'n an inneihna chu a beisei angin a kal lo tih a hriat chhuah velte pawh a lang dawn a nih hmel.

Nakkum kum tir lamah hi chuan production pawh an ṭan tawh hmel a, biopic siam lama tawnhriat ngah tawh tak Larrain kut chhuak a ni tur hian mi tam tak rilruah phurna a thlen ngei ang tih a rinawm. Diana lemah hian Naomi Watts pawh kha a lo chang tawh a,  Netflix royal drama The Crown-ah Emma Corrin chuan a lo chang tawh bawk. 

"Tunlai hunah chuan lemchan thiam ber zinga mi a ni," tiin Direc­tor Pablo Larrain chuan a fak hle.

"Kristen hi thil tam takah a chang thiam a, a ṭul a nih chuan dangdai tak leh dinhmun der­thawng tak ang pawhin a inlan thiam a, chak tak pawhin a inlan thiam bawk. Chutiang mi chu kan mamawh a ni.

"Script a hmuha a awmdan leh a character tur a bihchian dante chu hmuh a nuam hle. A film chan tam tak inang lo tak tak ka hmu tawh a, amah kan nei thei hi ka lawm hle; a inpe takzet a ni," a ti.

Diana Frances Spencer, Lady Diana hi Prince Charles-a nupui hmasa niin Prince William leh Prince Harry-te nu a ni. A hunlai chuan a hmelṭhatna a larpui a, British lal fapate nupui neih tawh zinga huhang ngah ber zinga mi a ni hial ang.

Kum 16 mi lek a nih laiin Prince Charles nen hian an in­tawng tawh a, kum 1981 khan an inhual a, an inhualna zungbun chung­chang ringawt pawh hi ngaihnawm tham hriat tur a awm.

Kum 1981 khan kum 21 mi lek a nih laiin Prince Charles nen an innei a, kum 1992 aṭang khan awm hrangin kum 1996 khan an inṭhen ta nge nge a, a kum lehah Paris-ah car chesualah a thi ta a ni.