Aizawl-ah Bollywood star - Gulshan Grover A channa 'FORBIDDEN' premiere a ni dawn

Bollywood leh Hollywood thlenga hriat hlawh, Katrina Kaif te nen pawha film lo changho zak zak tawh Gulshan Grover chu Aizawl-ah a lo kal dawn. Hei mai hi a ni lo a, a channa thar ber 'FORBIDDEN' film chu en tur a awm dawn bawk.

Mizoram sorkar, Innovations India (P) Ltd. leh Mizoram Film Forum (MFF) ṭangkawp chuan September 20-22 chhung hian Aijal Club-ah 'International Short Film Festival' an buatsaih dawn a, Mizoram-in hetiang festival lian a thlen ṭum khatna tur a ni. He hunah hian Bollywood khawvela hriat hlawh tak tak an fuankhawm dawn a, chung zingah chuan- Gulshan Grover leh Umesh Shukla te chu hming langsar an ni.

Tunge Gulshan Grover?
Kum 2003 khan Bollywood film lar tak pakhat 'Boom' tihchhuah a ni a, a hit hle a nih kha. He thriller/drama film-a changtute hi Katrina Kaif leh Amitabh Bachchan te an ni nawk a, chung zingah chuan Gulshan Grover pawh hi a tel. Chu chuan a chanchin leh sulhnu tam tak sawi lan kher loin a tarlang a ni.

Boollywood khawvelah chuan Gulshan Grover hi 'Bad Man' tiin an sawi ṭhin a, a hming aṭang rengin a duai lo. Gulshan Grover hian sulhnu ṭha tak tak a lo hnutchhiah tawh a, film pawh 400 chuang zet a chang tawh. Chung zingah chuan - I Love Desi, Bullet Raja, Jism, I Am Kalam leh Rocky te chu a lar zual an ni a, kum tir lama tichhuah Hate Story 4-ah khan a chang bawk. Hei bakah hian nakkuma tlangzarh tur Mogul - The Gulshan Kumar Story-ah a inlan dawn bawk.

Kum 62 mi Gulshan Grover hian award pawh a dawng hnem tawh hle a, Best Actor leh Contribution to Indian & International Cinema award te pawh a lo dawng tawh a ni.

New Delhi lam chhuak Gulshan Grover channa thar ber 'FORBIDDEN' chu Mizo mipuiin kan en hmasa ber thei dawn bawk a, MISFF 2018-ah hian premiere a ni ang. He short dramatic thriller film hi Vibha Gulati kutchhuak a ni a, hmaih phal chi a ni lo.

A vawi hnih nan Umesh Shukla
Indian film director zinga hriat hlawh ber pawl Umesh Shukla chu a vawi hnih nan Aizawl-ah a lo kal dawn. Bollywood hit tling pha 'Oh My God' director Umesh Shukla hian Mizoram a rawn kal ṭum khan Mizoram-ah film an la rawn siam ngei tur thu a lo sawi tawh a, tun ṭum a lo kal tur pawh hi a phur hle.

Actor ni bawk Umesh Shukla hian film eng emaw zat a lo chang tawh a, Bollywood-ah chuan a mikhual lo hle. Akshay Kumar leh Paresh Rawal-te channa 'Oh My God' kha a kutchhuak a ni a, dah hniam chi rual a ni lo.

Tun hnaia film chhuak 'All Is Well' leh '102 Not Out'-te pawh kha a kutchhuak zinga langsar an ni bawk. All is Well-ah hian Bollywood star Abhishek Bachchan a thawhpui a, hetiang mi hian Mizo film indusrty-in hma a sawn phahna tur thil tam tak a rawn keng tel ngeiin a rinawm.

National Film Award for Best Screenplay leh Screen Award for Best Dialogue chawimawina te a lo dawng tawh bawk.