Sawi mai aiin a takah climate change a nasa!

Mithiam ten sik leh sa inthlak nasat thu an sawi fo ṭhin a, chu chu a takah phei chuan a nasa hle a ni awm e. UN Secretary General Antonio Guterres chuan, "Climate change chu sawi mai aiin a takah a nasa a, ven a nih loh chuan a rahchhuah chu a hlauhawm hle dawn a ni," a ti.

Antonio Guterres chuan, "Kum 2020-ah chuan hei ai hian a nasa leh zual tawh dawn a, kal kalphung tam tak hi kan thlak a ngai a ni. Chumi a nih loh chuan khawvel hi dinhmun ṭha lo takah a ding thei a ni," a ti. Portugal prime minister hlui Guterres chuan khawvel ram hruaitute chu sik leh sa inthlak chak lutuk ven kawnga hmalakpuiah a sawm a, New York khawpuia special climate conference-ah pawh tel vek turin a sawm bawk.

Sik leh sa danglam chak lutuk hian tuia cheng nungchate tan pawh harsatna nasa tak a thlen mek tih sawiin, tuifinriat-ah pawh acid a tam leh zual tawh a ni, a ti. Tunah hian khawvelah hian kum maktaduai thum chhunga atmosphere-a carbon dioxide tam ber ṭum a thleng mek niin a sawi bawk.