Musical film chhuak thar tur 'Thingtlang Tlangval' shoot zawh a ni ta

Thla hnih chuang ngawrh taka an beih hnuah 'Thingtlang Tlangval' tih film chu shooting zawh fel a ni ta. He musical film chhuak thar tur hi editing khawih nghal a ni dawn a, kumin chhung ngeia tlangzarh hman beisei a ni.

'Thingtlang Tlangval' film-ah hian hmeithai fa pakhat, thingtlang aṭanga Aizawla college kal, a nuna harsatna leh buaina tam tak tawk chanchin tarlan a ni. A script hi PUC-a lecturer Malsawma Lailung ziah a ni a, film chan lama hnuhma nei ṭha tak tak hmuh tur an awm dawn bakah, zaithiam kan hmelhriatsa te hmuh tur an awm dawn bawk a ni.

Mizo film industry-a sulhnu nei ṭha tak - Malsawma Fanai (M-Space) leh Mapuia Chongthu (Leitlang Pictures) te chu he film buaipuitute an ni a, an kutchhuak en tawhte tan chuan a ngahhlelhawm leh zual hle ang. Shooting hi Aizawl, Lunglei leh Thenzawl lamah te neih niin, a changtute lam pawhin an chanpual ṭheuh an hneh sawh hle a ni.

A kal phung...

He film hi mitin mil tura siam a ni a, a bikin ṭhalai te tan chuan en ngei chi a ni. Ṭhalai nun dan tam tak pholan a ni a, musical film a nih ang ngeiin hla pawh paruk lai zeh a ni nghe nghe. An zaithiam em avanga kan lo hmelhriat ṭhinte kha, acting lamah pawh an lo duai loh zia an pho lanin a awm dawn.

Israel Lalbiakrema, Hlimhlimi leh Bethsy Lalrinsangi te chu a changtu zingah hian an tel a, 'Beiseina' tih hla mawi taka satu Sangtei Khawlhring pawh hmuh tur a awm dawn bawk.

Hlate hi a hranpa-a film mood nen inmil tura tih danglam vek a ni bawk a, Lal K. Sailo leh Keyboard thiam tak Muanpuia bakah, Siama (Zonun Recording) te'n an thiamna an pholang dawn a ni.

Director kamchhuak...

Film director Malsawma Fanai chuan, "He film-ah hian hla eng emaw zat a awm dawn a, hemi atan bik liau liau hian hla pahnih phuah thar a awm bawk a ni," a ti. Malsawma chuan an duh leh beisei anga editing an kalpui thei a nih chuan kumin chhung ngeia tlangzarh an tum thu a sawi a, a hun tur erawh a sawi lawk thei bik lo.

A changtute lam hi...

He film-ah hian lemchan lama hnuhma lo nei tawh - Rosangpuii (Damna Kim), Papuia (Scooty), Mimi (Ana­baino), Siamte-a (Awmpuipa) Gospel-a Tlau (Scooty & Kira) te kan hmu dawn. Tunah hian Lunglei lamah film cover leh poster tur shooting an nei leh mek a, Henry de Ccorn kutchhuak hmuh tur a awm dawn a ni.

'Thingtlang Tlangval' film-ah hian hmangaihna, thinrimna, lung­ngaihna, hlimna leh chhan­chhuahna te hmuh tur a awm vek dawn a, rilru hriselna (mental health) lam pawh tarlan a ni dawn. Lam hmuh nawm tak en tur a awm dawn bawk a, Steve leh Nutei (Fit In Dance Studio) te inthehṭhil en tur a awm dawn a ni.