Scream aia bengchheng Spider-Man
Spider-Man: No Way Home chu khawvela film sum lalut tam parukna a ni ta der mai!
North America Box Office-ah kar hmasa lam khan 'Scream' a rawn bengchheng viau a, mahse tun kar tawp chart-ah erawh kha chuan Spider-Man chuan 'Scream' chu a rawn tudai leh ta a ni.
Aw 'Spider-Man: No Way Home', i ropui zual zel e
Box Office chart chung berah kar hmasa lamah ding thei lo mah se 'Spider-Man: No Way Home' chu tunah chuan a rawn ding leh ta.
Kar tawp liam ta chhung khan theatre 3,705-ah chhuah a ni a, $14,005,614 hmu chhuakin North America Box Office-a sum lalut tam ber a ni. 'Spider-Man: No Way Home' hian North America aṭang ringawt pawh hian $720,891,602 zet sum a lalut tawh a, ram dang aṭangin $970,100,000 zet lalut tawh bawkin tuna a sum lakluh tawh zat chu $1,690,991,602 lai a ni hem tawh mai.
Tom Holland-a Spider-Man film pathumna, Andrew Garfield leh Tobey Maguire-te rawn inlan lehna hi kar hmasa kha chuan khawvela film sum lalut tam pariatna a la ni a, tun kar tawp chhung khan sum a lalut tam leh hman hle a, chumi a nih avang chuan tunah chuan khawvela film sum lalut tam parukna a ni der tawh. He dinhmun thleng tur hian thla hnih pawh hun a hman a ngai lo a, kar ruk chhung lekin hetiang zat sum hi a lalut hman a ni.
Tun kar tawpah khan 'Jurassic World' ($1.67 billion) leh 'The Lion King' ($1.66 billion)-te sum lakluh chu a rawn khum ta chiah a, 'Avatar', 'Avengers: Endgame', 'Titanic', 'Star Wars: Episode VII - The Force Awakens', leh 'Avengers: Infinity War'-te chauh a hmaa ding an ni tawh.
Pahnihna leh pathumna
Kar hmasa lama pakhatna 'Scream' chu pahnihna a ni ve thung a, tun kar tawp liam ta chhung khan theatre 3,666-ah chhuah niin $12,213,638 sum a lalut. Pathumna chu 'Sing 2' a ni a, $5,751,920 lalut ve bawkin 'Scream' nen hi chuan an sum lakluh a inthlau rem rem hle.
Film thar sawi ang
Palina 'Redeeming Love' leh pariatna 'The King's Daughter' chu Box Office Mojo chart-a film inlan thar awmchhun an ni.
'Redeeming Love' hi Christian Western romance film niin kum 1991-a tihchhuah 'Redeeming Love' lehkhabu behchhana siam a ni a, Netflix series 'Fate: The Winx Saga' star Abigail Cowen leh X-Men star Famke Janssen-te chu he film-ah hian an chang.
'The King's Daughter' hi chu action-adventure fantasy film ni thungin Pierce Brosnan leh Kaya Scodelario-te channa a ni.
Box Office top 10:-
1 Spider-Man: No Way Home $14,005,614
2 Scream $12,213,638
3 Sing 2 $5,751,920
4 Redeeming Love $3,530,180
5 The King's Man $1,783,179
6 The 355 $1,599,815
7 American Underdog $1,177,357
8 The King's Daughter $750,000
9 West Side Story $715,559
10 Licorice Pizza $659,953