Rpa Ralte-in Elena Ht Par a thawhpui; Hla thar an tichhuak dawn e

Mizo lengzem hla mawi tak tak, tunlai ṭhalaite ngainat zawng tak hla eng emaw zat phuah tawhtu leh zaithiam ni bawk Rpa Ralte chuan Elena Ht Par a thawhpui a, hla thar 'Kha ni kha' tih an rawn tichhuak dawn e.

Elena Ht Par hi mi tam tak chuan kan hre tawhin a rinawm. 'Melody' hla thiam taka satu kha niin Mizo hla a 'cover'-nate chuan YouTube lamah pawh thlir an hlawh viau. Tunah hian Chicago, Illinois, USA-ah cheng mekin Rpa Ralte nen hian Instagram aṭangin an intawng a, nikum lam daih aṭang tawh khan tuna an project hi an ṭan tawh a, tunah chuan a duh apiang tana ngaihthlak theih turin an peihfel ta a ni.

'Kha ni kha' hi Rpa Ralte phuah a ni a, Elena Ht Par hian a sa thung a, Elena official Mizo music video hmasa ber tur a ni a, a hla chu pop/rock deuh lam hawi tur niin Elena aw nen pawh a inhmeh hle niin Rpa chuan a sawi.

An hla tihchhuah tur hi YouTube lamah duh hun huna hmeh chhuah theih turin an dah thuai dawn a, Rpa Ralte hi music producer ni nghalin recording chu Daving Thawng kut chhuak a ni a, videographer chu Rinoz a ni thung.

Elena chuan Rpa, music industry-a talent nei ṭha tak nen an thawkdun thei chu a ngaihhlut thu sawiin, "Music hi ka tan chuan therapy a ni a, keimah mai bakah midang ka pawhna ber a ni. Kum 13 mi ka nih lai aṭangin ka zai ṭan tawh a, midang nena thawhhona ṭha tak neihna remchang ka neihna, project ṭha tak tak ka neihna ani.

"'Kha Ni Kha' shooting leh recording kan neih kha experience ṭha tak a ni. Music hi chu khawiah pawh a pangngai reng a, ṭawng hrang hrang hmanga hla dang tihchhuah zel theih ka beisei! Ka thinglung chhungril ber aṭangin lawmthu ka sawi e. Lalpan malsawm che u rawh se!" a ti.

Rpa hian a hma pawhin Zohnahthlak ram danga awm zaithiam tak tak- Shin Bia leh Van Hlei Sung-te pawh lo thawhpuiin a hlawhtling thei hle a ni.