Science & Environment Car thlawk thei a him tih pawmpui

Slovak Transport Authority chuan car thlawk thei, Klein Vision AirCar chu thlawk chhuak turin a him tawk tih pawmpuina 'airworthiness certificate' an hlan.

AirCar, thlawk chhuak tura a him tih pawmpuina Slovakia sorkarin a hlan hi BMW engine hmang a ni a, petrol pangngai tho hmangin minute 2 leh second 15 chhungin car pangngai aṭangin thlawk thei turin a inthlak danglam thei a ni. Ft 8000 vel zeta sangah a thlawk thei a, 160km/h-a chakin a thlawk thei bawk.

Slovak Transport Au-thority-in 'airworthi-ness certificate' an hlan hma hian darkar 70 lai chu thlawhtir chhin a ni tawh a, vawi 200 lai mai thlawh chhuahtira ṭumtir a ni hman niin company chuan an sawi.

AirCar siam chhuaktu Prof Stefan Klein chuan,"AirCar certification hian tam zawk siam chhuak thei turin kawng min hawn a ni," tiin a sawi a, mi pahnih chuan theihna niin a him tih pawmpuina hi pek ni tawh mah se commercial-a hman tur erawh chuan pawmpui a la ni lo thung.

Nikum June thla khan he AirCar hi Slovakia-a airport pahnih Nitra leh Bratislava inkarah thlawhtir a lo ni tawh a, minute 35 hun a hmang a ni. BBC hnena car siamtu company lamin an sawi dan chuan London leh Paris inkarah pawh thlawhtir leh thuai an tum a ni.

BBC chuan company dang pawhin lirthei thlawk thei leh kawngpuia tlan thei bawk chu an siam mek niin an tarlang.