DC FanDome: Virtual convention August-ah

Coronavirus hripui leng vanga mipui punkhawm phal a nih tak loh avangin Warner Brothers chuan DC FanDome online virtual convention an buatsaih dawn.

He convention hi ṭawng chi hrang hrang pakuain an pe chhuak dawn a, August 22 zan dar 10:30 aṭangin an ṭan ang. He hunah hian DC Extended Universe movie, TV. comics leh games-te pholan a ni dawn a, fan-te tana hriat nuam tak tak tur thil thar puanchhuahna hun a nih dawn bakah footage tharte an tilang bawk dawn a ni. DC multiverse-a hriat hlawh tak tak an inlan dawn a, DC movie cast-te leh film siamtute pawh an inlan ang.

Warner Bros. chuan time zone tinah “special presentation" an siam dawn tih an sawi a, hei hi DC fan-te tiphurtu pawh a ni.

DC multiverse aṭang hian  Aquaman, The Batman, Batwoman, Black Adam, Black Lightning, DC Super Hero Girls, DC's Legends of Tomorrow, DC's Stargirl, Doom Patrol, The Flash, Harley Quinn, Justice League Snyder Cut, Lucifer, Pennyworth, Shazam!, The Suicide Squad, Supergirl, Superman & Lois, Teen Titans Go!, Titans, Watchmen, Wonder Woman 1984, leh Young Justice: Outsiders-te kaihhnawihte an pholang dawn a, eng lam hawi zawngin nge an pholan dawn tih hriat a chakawm tawh hle.

An la pholan ngai loh an pholan tur zingah hian Dwayne Johnson-a Black Adam pawh a tel hmel a, James Gunn-a film The Suicide Squad leh Arrowverse series thar turte pawh a tel dawn.

Kum dang ang chu nise  Warner Bros. hian San Diego Comic-Con Hall H-ah hengte hi an pholang ngei ang, mahse kumin chu thil her danglam a ṭul a, chumi vang chuan DC FanDome chuan anmahni pual 'Hall of Heroes' an nei dawn ta a ni.

Warner Bros. hian DC fan-te tan remchanna an siam sak a, create.DCFanDome.com-ah fan-te chuan an lemziah an thehlut thei a, chu chu pholan tur zinga thlan chhuah a nih chuan judge-te'n an endik anga, pawisa tam tham tak a dawn theih dawn a ni.