Billboard : Adele ‘Easy on Me’ Hot 100 chart-ah kar 10 a cham ta

Billboard Hot 100 chart-ah Adele ‘Easy on Me’ bawk pakhatna a ni leh ta a, kar 10 lai mai (a zawn loin) he chart-ah hian pakhatna a ni tawh. 'Encanto Soundtrack' pawh Billboard 200 chart chung berah a rawn let ve leh bawk.

Chuai thei lo ‘Easy on Me’

Billboard Hot 100 chart-ah hian genre zawng zawnga che ṭha ber- streaming bakah radio airplay leh sales data thlengin an en vek a, chung zawng zawngah chuan Adele ‘Easy on Me’ bawk hi ropui ber lehin kar hmasa chhunga US-a an hla ngaihthlak tam ber a ni leh.

Nikum October thla chawhnu lamah khan Billboard Hot 100 chart-ah Adele hla hian hma a hruai ṭan a, January 14-20 chhung khan MRC Data-in a tarlan dan chuan radio airplay audience impression maktaduai 99 neiin, vawi maktaduai 14.3 zet an stream bawk a, download aṭanga hralh 5,200 a awm bawk.

Adele hi Hot 100 chart topper hla pahnih nei thei Artist pasarihna a ni chiah.

'Easy on Me' hi Hot 100 history kum 63 chhunga kar 10 lai chart topper ni thei hla 41-na ani chiah a, BTS 'Butter'-in nikum June-September thla chhunga he dinhmun a thlen hnua hetiang dinhmuna ding leh thei hla hmasa ber a ni.

British singer hian a hma pawhin hetiang record hi a lo siam tawh a, Kum 2015-16 khan 'Hello' hmang khan kar 10 chhung Hot 100 chart-ah ro a lo rel tawh bawk a, Artist pakhat hla pahnih hetiang dinhmuna dinpui thei pasarihna a ni chiah nghe nghe. Adele hlate hi Hot 100 chart-ah hian a hit tlangpui hrim hrim a, 'Rolling in the Deep' kha kar sarih chhung chart topper a ni tawh a, 'Someone Like You' kha kar nga chhung lai lo ni tawh bawkin 'Set Fire to the Rain' kha kar hnih chhung chart topper a ni ve tawh bawk.

Hot 100-a che ṭha dang

Carolina Gaitan, Mauro Castillo, Adassa, Rhenzy Feliz, Diane Guerrero, Stephanie Beatriz & Encanto Cast 'We Don't Talk About Bruno' chu pahnihna a ni a, Glass Animals 'Heat Waves' chu pathumna a ni thung.

Kar hmasa lama pahnihna The Kid LAROI & Justin Bieber 'Stay' chu palinaah thla thla thungin Kodak Black 'Super Gremlin' chu pangana a ni bawk.

Billboard 200 chart-ah 'Encanto' bawk

Billboard 200 chart chung berah 'Encanto' soundtrack a rawn let leh a, kar hmasa lamah pathumna ni mah se tun karah erawh a invawrh sang leh tawh hle. 'Encanto' soundtrack hi he chart-ah hian kar hnih pakhatna a ni ta chiah a, kar riat lai chart-ah a lang tawh bawk.

Kar hmasa lama roreltu Gunna 'DS4EVER' chu pahnihna a ni thung a, The Weeknd 'Dawn FM' chu pathumna niin Adele '30' chu palina a ni a, Morgan Wallen chuan a album hit rei tawh tak 'Dangerous: The Double Album' hmangin top 5 a khar a ni.

Chart dang

Artist 100 chart-ah chuan The Weeknd pakhatna a ni leh a, Adele chu pahnihna niin Ed Sheeran chu pathumna a ni thung.

Billboard Global 200 chart-ah chuan kar thum chhung GAYLE 'abcdefu' chu pakhatna a ni ta a, Billboard Global Excl. US chart-ah pawh kar thum chhung tho pakhatna a ni tawh a ni.