Taylor Swift Vs Damon Albarn

English singer, virtual band Gorillaz leh Blur frontman Damon Albarn chuan LA Times-in an interview-naah Taylor Swift chu mahnia hla phuah ngai lo a nih thu a sawi a, chu chu Taylor Swift chuan Twitter lamah na takin a chhang let.

Damon Albarn thukhawhchang chu

LA Times-in Walt Disney Concert Hall-a Thawhṭanni zana an kawmnaah Albarn chuan a kawmtuin Swift 'songwriter ṭha tak' tia a sawi chu chhangin,"A hlate hi a phuah a ni hlei nem," tia sawiin Billie Eilish pawh ṭha a tih zawk thu a sawi. "Taylor Swift ai chuan ka ngaina zawk," a ti a ni.

Interviewer-in Swift chuan a hla chu midang nen an phuah ṭhin tih a sawi pawh Albarn chuan,"Chu chu chhiar tel chi a ni lo. Co-writing chu ka hria. Co-writing chu mahnia phuah nen a danglam hle a ni. Tumah ka hua a ni loa, songwriter leh songwriter midangin hla an phuahpui ṭhin chu thil danglam tak a ni tih ka sawi mai a ni," a ti.

Taylor Swift a lungawi lo

'Red' singer chuan Twitter-ah Albarn chu mention-in LA Times Twitter post chu retweet-in a caption-ah,"He thil ka hmuh hma hi chuan i fan ka ni ṭhin. Ka hla zawng zawng hi ka phuah vek a ni. I thusawi hi thudik lo hulhual a nih bakah midang tichhe thei a ni. Ka hlate hi i ngainat a ngai kher loa, mahse ka hlaphuah 'discredit' i tum hi chu a dik lo hle a ni," tiin a ziak.

Chutichuan...

Damon Albarn hian Twitter lamah tho thupha a chawi ve nghal a, "I thusawi hi ka pawmpui vek che. Hla phuah chungchang kan sawi a, clickbait tura hman a ni hi a pawi hle mai. Tlang tak leh phut let nei miah lohin ngaihdam ka dil e. I hlaphuah 'discredit' tum chu ka duh loh ber zinga mi a ni. I hriatthiam ka beisei," tiin.

Taylor Swift hla tam tak hi midang nena an phuah a ni a, Jack Antonoff, Max Martin, Ryan Tedder leh Aaron Dessner-te pawh a co-writer zingah an tel a ni. Hetihlai hian a hla tihchhuah tawh hoa 54 lai chu amaha a phuah a ni thung a, a studio album pathumna 'Speak Now' a hla zawng zawng kha amaha a phuah vek a ni nghe nghe.