Mizo Idol 2018 ; Top 6 aṭangin mi pakhat tla dawn Zirtawpni zanah result puan leh top 5 intihsiak

Mizo Idol Season 6 chuan a vawr tawp a hnaih chho mek zel a, intihsiak boruak pawh a sang sawt hle. Thawhlehni zan khan top 6 intihsiak zawh a ni a, mi pakhat thlahliam a ngai dawn. Zirtawpni zan hian show tir lamah result puan a ni ang a, top 5 lut te an intihsiak zui dawn a ni.

Show a hmuhawm
Top 6 intihsiak zanah guest artist mi pali an awm a, show tihmuhnawm zualtu an ni. Mizo Idol intihsiaka lo inlan tawh te an nih avangin Idol tihlutu an ni a, an theihna san zia an pholang bawk.

Show neihna hmun hi College of Veterinary Sciences and Animal Husbandry, auditorium, Selesih a ni a, light leh sound pawh a changtlung hle. TV lam aṭanga lo thlirtute tan pawh mit leh beng a tlai a, show hmuhnawm tak a ni.

Jonathan-a lehkha thawn chu...
Pangzawl tlangval Jonathan Lalengzauva chuan CFL Hmingthanga hla 'Lehkha thawn' tih hmangin bul a ṭan a, a che ṭha leh pek hle. Jonathan-a hi judge-te'n kal khat deuh niin sawi ṭhin mah se, fak loh theih lohin a perform thei zel. A style a danglam a, a sak tur awm tak hla thlan a thiam ṭhin hle. Mipuiin an ngainatna 'Leikapui Style' champion pui turin theihna a nei a, a lakah beiseina pawh a sang hle a ni.

Dawngkimi a che sual ṭhelh!
Kolasib nula Malsawm­dawng­kimi chuan Rev. Zoram­sanga lehlin 'Min kalsan lo la' tih hla a sa a, hla thu a theih­nghilh zauh zauh. A tirah buai phah deuh mah se ṭha takin a perform tluan thei a, fak a hlawh let phah hlauh! Mi tam tak talbuaina turah ropui takin a comeback thei a, mipui rilru a hnehlet theih avangin a fakawm hle.

Kum naupangte ni mah se, zai lamah chuan a puitling tawh tih a lantir. Judge te pawn an fak viau a, chutih rual chuan a chetsual zauh hian result a nghawng dawn em tih chu a hriat thuai dawn a ni.

Mami a serious
Top 6 intihsiaka medley sa awm chhun H. Lalnunsiami'n a ti mai mai lo tih a takin a lantir a, ke lawng ngatin a perform! Rilru a pek theih dan ber leh a nuam tih dan berin a perform a, a hmunawm takzet. Mami hian 'Min siam thar rawh' tih hla hmangin bul a ṭan a, 'Khawingaihna mak, mawi leh duhawm' tih hla hmangin a tawp a khar thung.

Judge - Robin Lalremruata chuan, "A ngaihnawm tak zet a ni," tiin a fak a, chutih rual chuan hmasawnna tur a nei tih a lang.

Thinlai luahtu - Ticos
Mizo Idol Season 6-a boruak nei lian ber tih ngam a ni a, a zai tawh chuan nula lam phei chu an ṭhu hle hle thei ṭhin lo. Social media lamah pawh a lar a, a zai ngainatu an tam hle. A 'signature' pakhat Guitar nen Ticos Darhmingliana'n stage a lawn a, 'Thinlai luhtu' tih hla a sa. Ticos-a hian a contestant pui te ang bawkin hla sak nuam tih bik a nei a, muan fan lam a sa ṭhin. A thiam leh nuam tih zawng tak hla sa chhungin Idol zinkawng a zawh zui zel thei dawn em tih chu hriat chakawm tawh tak a ni.

Zemabawk hmachhuan - Teawmi

Top 11 intihsiak zawh rualin result puan a ni a, top 5-ah Immanuel Lalawmpuii hming a lang lo. Tla tawh tura ngaih a ni hman a, mahse a thiamna leh theihna hre chiangtu judge-te'n intihsiak hmachhawn zui atan an duh a, mi paruk an tlin phah ta a nih kha. Teawmi'n a laka beiseina sang tak neitute ṭha takin a changlet a, a perform ṭha hle.

Zemabawk nula Teawmi hian John Hnamte hla 'Leng­dang an tam' tih a sa a, a aw pek a dik hle. A perfom pawh a hmuhnawm lehpek hle a, a ke chheh a fuh viau bawk. Teawmi hian top 5 inhlangkai thei tur khawpin talent a nei ṭha a, Zirtawpni zanah engkim a chiang dawn.

Jerry a la thiam reng
Kum eng emaw zat zai hmanga ei lo zawng tawh a ni a, Mizo Idol-ah a thiam zia a takin Mizo mipui hmaah a pholang. Chanmari tlangval Jerry Lalrinawma hian top 6 zan khatnaah hian 'I belh pawn' tih hla a sa a, a hnehsawh leh pek hle. A hmuna entu mipui thawm a ring ṭha a, TV lama lo thlirtute tan pawh a thiamna hmuh hmaih rual a ni lo. 

Mizo Idol ni thei tur khawpa talent nei ṭha a ni a, chu chu top 25-ah khan a takin a lo lan tir tawh. Eng hla pawh sa se ṭha taka sa chhuak thei tur a ni a, thiamna leh theihna hrang hrang nei zingah a chungchuang hle. Chutih rual chuan intihsiak boruak a san tawh avangin zai thiam piah lamah, hla thlan fimkhur a ngai hle bawk.

Zirtawpni zan hian intihsiak hi a hmun ngaiah neih leh tur a ni dawn a, a tirah top 5-a tlingte hming puan a ni ang. Show hi zan dar 8-ah ṭan ṭhin a ni a, Zonet Zawlbuk leh internet lamah live-a pekchhuah a ni.