Aizawl FC-in pressure kan nei lo - Gift Raikhan ; Tlai dar 3-ah Aizawl FC vs Chanmari FC

Mizoram Premier League Season 7 bul ṭan nan Aizawl FC-in kai thar Electric Veng FC an hneh lo a, vawiin tlai dar 3:00 hian anmahni ang bawka MPL-a vawi hnih champion tawh Chanmari FC an hmachhawn dawn.

I League best coach atana thlan Gift Raikhan chuan AFC a enkawl hnuah inelna pahnih a hmachhawn tawh a, nomawi a la chawi loh ve ve bakah Electric Veng ṭum hnih a hneh tawh lo nachungin pressure an neih loh thu a sawi.

AFC an ṭha?
Aizawl FC-in tualchhung player ṭha an la khawm thei a, hemi belhchhah tur hian state pawn player pahnih leh foreigner pathum an kawl. I League club hi MPL-a champion turin an squad a chhah ṭha tawk.

Amaherawhchu AFC hian match hmasa berah Electric Veng 2-1 in an hneh lo a, goal hnih an chhuah hnuah chauh goal an khung. I League club hi an result leh an khelh dan aṭanga thlir chuan an ṭha tih a harsa.

Chutihrualin match khat aṭanga teh a rem lo a, Aizawl FC-in Electric Veng an hmachhawn ṭumin keeper Gurpreet Singh leh defender Govin Singh bakah foreigner pathum zinga pahnih Mali midfielder Amadou Alou Sissoko leh Ghanaian forward Francis Dadzie te an la chhawr lo tih hriat tel a ṭul.

I League best coach Gift Raikhan-a'n a enkawl bawk avangin an squad thlirin an ṭha tih loh theih loh a ni.

Tuna pawimawh
Tun dinhmunah erawh Sissoko leh Francis te an visa a la fel loh avangin Alfred Kemah Jaryan chiah chu an foreigner chhawr theih chhun a ni a, thu lawmawm erawh vawiin hian Neroca aṭanga an lak Govin Singh an chhawr ṭan dawn.

Season liam taa Ramhlun North player pawimawh Lalrinfela chu chhungkaw harsatna avanga match hmasa ber a khelh loh hnuin a inlan thei tawh dawn a, Khawlailung tlangval hi I Day Football-ah AFC goal nawrna ber pakhat a nih avangin a inlan thei tur hi I League club tan thu lawmawm a ni.

Aizawl FC coach Gift Raikhan chuan, "Set piece-ah goal hnih kan chhuah a, Electric Veng kan hneh loh danah kan vanduai telin ka hria a, kan player-te an theihna angin an khel lo bawk. Chak loh kan duh loh nachungin tuna kan chak loh hi insiamṭhatna a nih chuan kan tan chanchin ṭha a ni ang," tiin a sawi.

I Day Football-ah khan AFC hian Electric Veng an hneh loh hnuin Chanmari hi 6-0 in an sawp thei a, tun ṭumah hian khami ṭuma hattrick siamtu Lalkhawpuimawia leh goal khungtu dang Rinfela, Lalrinchhana Tochhawng leh Hmangaihkima te chhawr theih turin an awm vek.

Chanmari an inpeih
I Day Football-a mualpho Chanmari FC hian Aizawl FC laka goal ruk an chhuah hma hian MFA Super Cup final an khel a, an chak loh chhanah I League club aia hahdamna hun ṭha an neih tlem chu an puh.

Chanmari coach Lalruatliana Sailo chuan, "Tunah chuan kan hahdam tawh a, inkhel turin kan inpeih. Match hmasa lama inhliam vanga chhawr ngam loh Muanzova leh Mabiaa te pawhin training an zawm tawh avangin mamawh dan a zira chhawr theih an ni ang," tiin Vanglaini a hrilh.

Tawia hote hian MPL ṭan nan team ṭha Ramhlun North an hneh theih avangin team boruak a ṭha a, an khingpui aiin pressure an nei tlem zawk. Amaherawhchu match hmasa bera goal hmasa ber khungtu Lalnuntluanga chu chhungkaw harsatna avangin a inlan theih a rinawm lo a, goal hnihna khungtu Lalnunzama erawh bul ṭan nawn turin a awm.

Chanmari boss Tawia chuan, "Tluanga a awm lo a nih pawhin a thlakna tur kan nei ṭha a; Hriatpuia, Jeremy leh Omega te chu chhawr ngam vek an ni. Zama pawh a dam ṭha a, bul a ṭan nawn ang em tih erawh ka sawi thei lo," tiin Khelo India best player chungah pressure dah tam a tum loh thu a sawi.

Engtin zel?
Vawiin tlai inkhel tur hi coach ṭha pahnih inelna a ni a, an player neih dan pawh an inthlau tam lo. Aizawl FC coach Gift Raikhan chuan pressure ka nei lo ti mah se Chanmari an hneh lo a nih chuan pressure a awm ṭan dawn. Hetihlai hian Chanmari FC pawhin MPL5 an champion hnua nomawi an chawi tawh loh avangin Tawia tan pressure awm lo tawp a ni lo.

AFC boss Gift chuan, "MPL hi a harsa em em a, team tin hi inhneh tawn thei vek an ni. Keini hi I League khel tur kan ni a, MPL-a khel tlak loh chu I League-ah pawh an rintlak dawn lo. Chuvangin tun aṭangin player-te hi an inel a ngai," tiin a sawi.

Aizawl FC Vs Chanmari
* MPL-ah vawi hnih ve ve an champion tawh.
* Kumin MFA Super Cup-ah Chanmari FC-in final lut turin Aizawl FC chu extra time-ah 4-3 in an hneh.
* I Day Football-ah erawh group khatah awmin Aizawl FC-in Chanmari hi 6-0 in an sawp.
Mipui ṭhutna
Aizawl FC: K. Kawla Stand leh S. Malsawmtluanga Stand
Chanmari FC: Zomuanthanga Stand leh Zohminga Zote Stand
* MPL Board chuan round 6 thlengin tlai dar 2:00 inkhel chu tlai dar 3:00-ah a sawn.
* Inkhel en man hi Rs 30 a ni a. School uniform ha leh kum 65 chunglam tan a thlawnin inkhel a theih.