Hip-Hop artist zinga sum lalut hnem ber - JAY-Z

Forbes Magazine chuan Hip-Hop artist te sum lakluh a tarlang leh ta a, American rapper Jay-Z chu kum khat chhunga sum thawk chhuak hnem ber a ni.

Forbes chuan kum khat chhunga American rapper sum lakluh hi $mtd 76.5 velin a chhut a, Sean Combs chu sum lalut tam pahnihna a ni. Jay-Z hian tour aṭangin sum a lalut hnem hle a, a nupui Beyonce nena 'On The Run II' tour an neih aṭang ringawt pawhin a hailut hnem hle. The Carters hian 'Everything Is Love' album an tichhuak a, heta ṭang hian Jay-Z hian sum a lalut nual bawk.

American rapper tho Diddy sum lakluh zat chu $mtd 64 a ni a, Kendrick Lamar chu pathumna a ni. Lamar hian nikum June leh kumin June inkar khan $mtd 58 a lalut a ni.

Candian rapper Drake chu palina niin, $mtd 47 a lalut. J. Cole chuan $mtd 35.5 lalutin top 5-ah a lang phak a, a hnuaia awm te chu Dr. Dre, Pitbull leh Kanyae West te an ni nawk. American rapper Dr. Dre hian $mtd 35.1 a lalut a, Nas ($mtd 35) nen an sum lakluh a inthlau lo hle.

American rapper lar Pitbull chuan $mtd 32 lalutin pariatna a ni pha bawk. Future chu sum lalut tam pakuana a ni a, Kanye West chuan top 10 hmawr a bawk a ni. Top 10-ah hian American Hip-Hop artist an tam fal hle a ni.

Sum lalut hnem Top 10
1. Jay-Z - $mtd 76.5
2. Sean Combs - $mtd 64
3. Kendrick Lamar - $mtd 58
4. Drake - $mtd 47
5. J. Cole - $mtd 35.5
6. Dr. Dre - $mtd 35.1
7. Nas - $mtd 35
8. Pitbull - $mtd 32
9. Future - $mtd 30
10. Kanye West - $mtd 27.5