Carrie Underwood album thar 'Cry Pretty' tlangzarh a ni ta

Carrie Underwood chuan a studio album parukna 'Cry Pretty' chu nimin khan a tlangzarh ta. He album hi recording label - Capitol Records Nashville nena an thawhdun hnua a album hmasa ber a ni bawk.

American country music sin­ger hian a album title 'Cry Pretty' hi kumin April hla khan a single a lo tichhuak tawh a, album tlangzarh a nih hma hauhin a lar vet vet hle. Billboard Country Airplay chart leh Country Radio chart-ahte a che ṭha hle a, Digital Songs chart leh Billboard Hot 100-ah pawh a thleng sang hle a ni.

'Cry Pretty' bakah hian single dang 'Love Wins' a tichhuak a, tun thla tir lam khan 'End Up with You' chu a tlangzarh leh bawk. Single a tichhuah te hi album hmangin a chhu zui sak a, a hit leh hle turah ngaih a ni.

Carrie Underwood hi harsatna hrang hrang karah huaisen takin a ding a, album pawh a sual chhuak leh ta a ni. 'Cry Pretty' singer hi nikum November thla khan a tlu sual a, zai a ngai hial. A hmai zai a ni a, hmun eng emaw zatah an ṭhui a ni. Zai a tawh avang hian mipui hmaah pawh hun eng emaw chen a inlan lo a, kum tir lam thleng khan hmuh tur a awm meuh lo.

A vawi khat nan April thla khan Academy of Country Music Award-ah a inlan a, 'Cry Pretty' tih hla hi a sa nghe nghe. He hla a sak lai hian a mittui a tla hial a nih kha. Mipui hmaa a inlan leh tur thu puan a nih tirh khan fan-te pawh lawm avangin an zuang a, stage-a a dinchhuah hnua-a a lungchhiatna pawh an ṭawmpui thiam hle a ni.

Carrie Underwood hian nau a pai mek bawk a, chuti chuang chuan a album parukna hi a sualchhuak a ni. 'Cry Pretty' album hi kum 2015-a 'Storyteller' album a tihchhuah hnua a hmasa ber niin, hla 13 a awm a ni.