Mizo Idol nih phu Malsawmdawngkimi'n Top 5 a inhlangkai zo ta lo
Top 5 result puan hmain contestant te koh chhuah vek an ni a, host-in zawhna a zawt. Malsawmdawngkim chuan, "Mizo Idol nih hi ka phu a ni," a ti a, mahse Kolasib nula hi top 5-ah a inhlangkai zo lo. Dawngkimi hi vanduai vanga tla ti pawhin a sawi theih a, top 6 intihsiakah hla thu a theihngilh a ni.
A sawi ang ngei hian mi tam tak chuan Mizo Idol tura an hual a ni a, theihna pawh a nei sang hle. Mahse a tum ram thleng zo lovin a tla a, rimawi khawvelah erawh kan hmu zui zel dawn a ni.
Result hi Zirtawpni zan khan puan a ni a, Jerry Lalrinawma, H. Lalhmunsiami, Immanuel Lalawmpuii, Jonathan Lalengzauva leh Ticos Darhmingthanga te chu top 5-ah an inhlangkai. Heng mi panga zing aṭang hian tu emaw ber chu Mizo Idol a ni dawn a, an zinkawng erawh a hautak dawn chauh a ni.
Top 5 te chu
Show tir lamah result puan a ni a, intihsiakin a zui nghal. Top 5-a tling te hi hla pahnih hmangin an intihsiak a, an thiam tlang hle. An hla sak te hi Music Domain Mizoram (MDM)-in Mizo hla inphuahsiak an buatsaiha hla ṭhenkhat leh an hla sak tawh sa te a ni.
Chhinga Veng tlangval Ticos-a chu dingchhuak hmasa ber a ni a, a zai ṭha leh pek hle. Ticos-a hian 'Lungmawl duhthusam' tih hla a sa a, a aw nen pawh a inmil hle. A sak tur awm tawk a thlang thiam a, endiktute pawhin an fak viau bawk.
Break neih hnuah Ticos-a'n a hla sak thiam sa 'Hmangaih hmasa ber' hmangin mipui a awi leh a, a sa nalh leh pek hle. Kum naupang te ni mahse theihna sang tak a nei a, ṭantu pawh a ngah hle a ni.
Pangzawl tlangval Jonathan Lalengzauva'n 'December zan thla' tih leh 'Kir an rel lo' tih hla a sa a, lawm a hlawh hle. Jonathan hi a kal khat deuh mah mah niin sawi ṭhin mah se, top 5 intihsiakah erawh a che ṭha ber te zinga mi a ni. Thiam takin 'December zan thla' a thlawh chhuak tei a, dah hniam chi a ni lo. A lo chet ṭhatpui tawh 'Kir an rel lo' tih hla pawh lungkuai takin a sa chhuak leh thei a ni.
Mizo Idol intihsiaka boruak nei lian tak Jerry Lalrinawma chuan 'Nang ngaih a zual' tih hla hnehsawh takin a sa a, entu mipui thawm a ṭha leh pek hle. He hla hi Bruce Pachuau phuah niin, Jerry-a sak awm tak tak hla a ni a, a aw nen pawh a inmil hle a ni. Jerry-a hian hnehsawh taka a lo sak tawh 'Rinawmin' tih hla chu a sa bawk a, a thiam a la theihnghilh lo.
Suangpuilawn mipui tan lawmna tur a awm a, top 5 intihsiakah Immanuel Lalawmpuii a che ṭha hle. Zemabawk-a khawsa mek Teawmi hian 'Vawng dun zel ang' tih leh Lalrindiki Khiangte sak ṭhin 'Mahse maw' tih hla a sa a, a hmuhnawm takzet. Teawmi hi stage performance-ah chuan a tiṭha ber zinga mi niin, a hla sak milin a che thiam hle a ni. A zai piah lamah a hmuhnawm tel a, mipui lawm pawh a hlawh hle a ni.
Champhai nula H.Lalhmunsiami chuan 'Ka lo kir e' tih leh, top 11-a a lo sak tawh 'Aw Isua a ni' tih hla a sa a, a zai a nung ṭha hle. Mami hian hla muang leh cool lam a sa nasa a, a theihna pawh a phochhuak ṭha hle a ni.
Top 5-ah hian contestant te an che ṭha tlang hle a, tunge tla ang tih pawh hriatthiam harsa tak a ni. Thawhlehni zanah intihsiak a awm leh dawn a, show tir lamah result puan leh a ni ang. Pakhat thlah liam a ni ang a, top 4 te an intihsiak zui dawn a ni.