Justin Bieber-a'n US khua leh tui nih a dil?

Canadian singer lar Justin Bieber chuan U.S khua leh tui nihna a dil niin, khawthlang media te chuan an sawi. TMZ chuan Bieber hian Hailey Baldwin nen an inneih hma ngeiin Canada leh U.S khua leh tui nihna neih kawp a duh niin an tarlang a ni.

Justin Bieber hi Ame­ri­can model Hailey Baldwin nen innei mai tur anga sawi an ni fo a, ṭhenkhat phei chuan court hmaah an inkutsuih tawh niin an sawi. Hei erawh an pha thung a ni.

Heng tiang boruak a awm mek lai hian U.S khua leh tui nih a dil thu a thang leh ta a, thu chiang hriat a la ni lo. Canadian singer hi Los Angeles-ah hun rei tak chhung a khawsa tawh a, khua leh tui nihna a dil pawh hi a mak lo. Khua leh tui nihna neih kawp chu a duh ber niin an sawi a, hun erawh a mamawh deuh dawn niin a lang.

Kum 24 mi Justin Bieber leh model Hailey Baldwin (21) te hian tun hnai khan New York City-ah inneih phalna Marriage License an dil niin an lo tarlang tawh bawk. Marriage License hi pekchhuah aṭanga ni 60 chhung a dam niin an sawi a, thil a kal tluan chuan an innei har vakin a rinawm tawh lo.

Canadian pop star leh American model te hi July thla khan an inhual a, a hun leh ni hriat la ni lo mah se Canada lamah inkutsuih an tum niin an tarlang bawk.