Netflix leh Aaron Sorkin-te'n inremna siam

Streaming giant Netflix chuan American crime drama film thar tur, 'The Trial Of The Chicago 7' tichhuak turin director Aaron Sorkin chu $maktaduai 56 hu inremna an siampui niin Hollywood Deadline chuan a tarlang.

Netflix chuan he film thar tur hi tlangzarh a nih hunah a pechhuak dawn a, hemi atana pawisa a hauh zat hi $maktaduai 56 a ni tih July 1 khan a tichiang. Netflix hian he film thar hi US president thlanna neih ni tur, November 3-ah tlangzarh a tum nia sawi a ni.

'The Trial Of The Chicago 7'  chungchangah hian Aaron Sorkin leh Paramount Pictures chu a hmain an lo inbe tawh a, inbiakna hmasaah hian he film hi September 25-a tlangzarh tum niin, theatre-a pek chhuah tum a ni. Mahse Covid-19 hripui a ken vangin theatre tam ber khar a ni ta si a, Paramount pictures nena inbiakna an neih tawh pawh hi June 20 khan sut leh a nih thu tarlan a lo ni tawh.

Kum 1968-a Chicago-a Illinois khua a mi pasarih Abbie Hoffman, Jerry Rubin, David Dellinger, Tom Hayden, Rennie Davis, John Froines leh Lee Weiner-te chanchin zulzuia siam niin, a hun lai khan federal government chuan heng mi pasarihte hi Democratic National Convention tibuaituah a puh a ni.