Horizon Zero Dawn PC-ah khelh theih dawn

PlayStation 4 plat­form-a game khelh hlawh tak  Horizon Zero Dawn chu August 7 aṭang hian PC version an tichhuak dawn.

Report ṭhenkhatin an tarlan dan chuan Steam leh Epic Games Store-ahte an zuar chhuak dawn a, $49.99 man a ni ang. Sony hnuaia awm game developer Guerrilla Games chuan Zirtawpni khan Horizon Zero Dawn complete edition trailer thar an tichhuak a, gamer-te chuan an ngaihven nghal hle.

Trailer aṭanga a lan dan chuan PC version-ah hian feature thar leh improvement hmuh tur a awm dawn a, ultrawide display support, unlocked framerate, dynamic foliage, deep graphics customization settings, improved reflection, leh expanded controller option-te hmuh tur a awm.

Horizon Zero Dawn hi Kum 2017 khan PlayStation 4-a khelh theih turin tlangzarh a ni a,  action role-playing game niin, sawiseltu awm ve bawk mah se critics lam pawhin an fak hle.  Award pawh a dawng nual tawh a, February 2019 khan copy mak­taduai 10 vel lai an hralh tawh a, PlayStation 4 game-a hralh kal ber pawl a ni mek. Nakkum hian Playstation 5-a khelh theih turin a chhunzawmna  Horizon Forbidden West tlangzarh leh an tum bawk a ni.