Mizo Idol 2018 ; Zaninah tunge kan thlah dawn? Ticos - Jonathan - Mami - Teawmi & Jerry

Top 6 aṭangin Kolasib nula Malsawmdawngkimi thlahliam a ni tawh a, zaninah - Ticos Dar­­hmingthanga, Jonathan Lal­eng­zauva, H. Lalnunsiami, Immanuel Lalawmpuii leh Jerry Lalrinawma te zinga tu emaw ber zinkawng a tawp ve leh dawn a ni. Show tir lamah result puan a ni ang a, top 4 te an intihsiak zui ang.

Survival of the fittest!
Mizo Idol Season 6-ah con­testant 600 chuang an tel a, tuna dam chu mi panga chiah an ni tawh. A thiam leh ṭha ber din channa tur a nih miau avangin an la inthlifim chho zel dawn a, a ruhno no an chhuak dawn a ni.

Contestant pang zinga tu emaw ber chuan zaninah Mizo Idol a mangṭha a ṭul dawn a, tla tur erawh rin thiam a harsa hle. Top 5-ah hla pahnih hmangin an intihsiak a, an che ṭha tlang hle. Chutih rual chuan mi pakhat tan chauh Mizo Idol a nih theih avangin tla an awm a ngai si a, tupawh tlingin tla pawh nise pawm thiam a ngai dawn tihna a ni.

Pangzawl tlangval Jonathana a zaithiam zia sawi nawn a ngai lo a, Ticos Darhmingthanga talent hmuh hmaih chi a ni lo. Champhai nula Mami'n a theihna san zia a pholang fo tawh a, Teawmi lah judge-te beisei anga inlan thei zel a ni. Jerry Lalrinawma'n zai lamah mi bik a nih zia a takin a lantir thei zel a, Mizo Idol zinkawng a ngaihnawm takzet.

Hla khat chauh maw?
Contestant-te'n top 5 intih­siak­­ah hla pahnih an sa a, zaninah chuan hla pakhat chauh an sa dawn. An hla sak tur thlan sak an ni dawn lo a, an duh tak an sa thei dawn a ni. Hla thlan thiam a pawimawh leh hle dawn a, an mahni aw mil tak vek an rawn sa chhuak leh a nih pawhin a mak lo vang.

Live music a nih leh dawn a, inbuatsaihna pawh ṭha takin an nei thei a ni. Chutih rual chuan an zinkawng zawh a thui tawh avangin aw chau leh fit lo awm thei a ni tawh a, fimkhur a ngai hle.

Guest Artist
Ṭum dang ang bawkin zanin­ah guest artist kan hmu leh dawn a, show tihmuhnawmtu tur te an ni. Mi panga an zai dawn a, chung zingah chuan Thawhlehnaniropuia pawh a tel. Puipuia bakah hian Mizo Idol star - Rachel Lalnunkimi, Mathlenga leh Thiamchantira te an zai dawn a ni. U Got Talent 2017-a Junior bika pakhatna H.Lalruatpuii chu zanin hian a zai dawn bawk a, hmaih phal chi a ni lo.

Mizo Idol hmasa ber 2007-a pahnihna, Mathlenga zai ngaithak tur a awm tur ringawt pawh show en tichakawmtu a ni a, tunlaia boruak nei lian tak Rachel-i perform pawh en chakawm tawh tak a ni. Kum naupangte ni chunga Mizo Idol intihsiaka dinhmun sang tak lo thleng tawh Thawh­lehnaniropuia zai pawh ngaithlak chakawm tak a ni.

Engtin zel?
Mizo Idol Season 6-ah hian Top 11 aṭang khan social media lamah contestant te zai video upload ṭhin a ni a, hei hian kawngro thui tak a su a ni. Video te hi Zonet YouTube Channel, Mizoram Idol Facebook Page leh Mizo Idol Instagram account-ahte upload niin, judge ten thutlukna an siam dawnah hengte hi en tel ṭhin a ni. Viewer nei ngah tan vanneihna a ni a, a pawimawh hle a ni.

Mizo Idol-in hlut a hlawh a, social media lamah pawh a lar hle a ni. Top 11-a tla te khan Rs. 10,000 ṭheuh an dawng a, top 5 inhlangkai zo ta lo Malsawm­dawngkimi khan Rs, 15,000 a dawng bawk.

Zanin hian show hi dar 8:00-ah ṭan a ni leh dawn a, live-a pek­chhuah a nih bakah internet kaltlangin en theih a ni bawk.