Hontrade International Ṭhazual Lengzem ; A hmun ngaiah Zorinzuali Khiangte

Ṭhazual lengzem chart-a vawi eng emaw zat pakhatna lo hauh tawhtu, Zorinzuali Khiangte chu a dinhmun ngai No.1 bawk a rawn kir leh ta.

Zorini hian July thla khan hla thar a tichhuak a, chu chu 'Min hnawl si maw' tih a ni. He hla hmang ngei hian Ṭhazual chart-ah dinhmun sang ber a luah leh ta a, mipuiin a zai an ngaithla kham lo. Music video a siam tawh chuan a larpuithei zel thei a, tun ṭuma mi pawh hian thlan a hlawh leh pek hle.

'Min hnawl si maw' tih hla hi Bibi Hmar phuah niin, music track hi Mizo zinga rimawi lama hriat hlawh tak Lal K Sailo siamsak a ni. Lal K Sailo hian rimawi piah lamah video siam pawh a thiam tel a, Zorini music video pawh hi a kutchhuak a ni.

Tun ṭum chart-ah hian Jenny Jathang chuan pahnihna a rawn luah ve leh bawk a, ani hi No.1 pawh lo hauh zak zak tawh a ni. 'Tuarthiam rawh aw' tih hla hmagin Zoram mipui min awi mek a, a zai ngaithlak a manhla hle a ni. Josephine Lalawmpuii chuan 'Duhaisam Di' tih hla hmangin pathumna a luah a, top 3-a lang te hi hmeichhia vek an ni.

Aziri leh Marina Vanhriatpui Varte te chu top 5-ah anlang leh bawk a, Kawnpui nula Aziri hi chart hmasa-ah khan pakhatna a ni. Sangkimi Khiangte, Zohmaa Pachuau, Rachel Lalnunkimi, Noel Hrahsel leh KR Robert te chu top 10-ah an inhlangkai bawk. Rachel hian tun hnai khan music video thar 'Mai a lum e' tih chu a tlangzarh a, chart-ah a inlar nghal thei a ni.

Hontrade International Ṭhazual Lengzem Top 10
1. Zorinzuali Khiangte - Min hnawl si maw
2. Jenny Jathang - Tuarthiam rawh aw
3. Josephine Lalawmpuii - Duhaisam Di
4. Aziri - Hmangaihna
5. Marina V. Varte - All In
6. Sangkimi Khiangte - In tello chuan
7. Zohmaa Pachuau - Zunleng di i zun
8. Rachel Lalnunkimi - Mai a lum e
9. Noel Hrahsel - Aw 'D'
10. KR Robert - Mengmawi