Praise On Ṭan a ni leh dawn ta

Praise On 2018 chu vawiin dar 10:00 hian Mission Veng Kohhran Hall-ah ṭan a ni leh dawn ta a, KṬP branch 50 chuang aṭangin band 59 an tel dawn a ni.

Vawiin leh naktukah intihsiak thawh­khatna neih a ni ang a, September 21, Zirtawpni zan dar 8:30-ah result puan a ni ang. Round-2-ah band 30 vel an tling chho dawn a, intihsiak hi live-a pekchhuah ṭhin a ni ang. Synod TV channel, Hruaina Eng-ah live-a pek chhuah tur niin, ZONET leh LPS-ah en theih a ni dawn bawk.

Tun ṭum Praise On-ah hian host thar kan hmu dawn a, ZONET Zing Daifim puangtu leh Hruaina Eng channel-a presenter ni bawk K. Lalrampani (Mapuii), Chanmari, Aizawl chuan a host dawn a ni. Judge pawh a thar hlak an ni dawn a, Upa Zothanmawia, Khatla, T.Upa Richard V.L. Zara, Chawnpui leh T.Upa Elijah Lalrinawma, Kulikawn-ten endik hna hi an thawk dawn a ni.

Mizoram Synod hnuaia Information & Publicity (Synfo) buatsaih Praise On hi kum 2016 khan buatsaih ṭan a ni a; kum 2016-ah malzaia intihsiak niin, nikum khan group zaia inelna neih a ni. Kuminah chuan band (beat group) hmanga intihsiak a ni ve thung tawh dawn a ni.