Champions League ; Liverpool vs PSG: Zinkawng hautak a inṭan

Champions League finalist Liverpool-in Europe-a club inelna sang bera an zinkawng chu zanin hian an ṭan dawn a, dar 12:30 hian Paris Saint-Germain an mikhual dawn.

Liverpool bul ṭanna a hautak dawn a, Tottenham Hotspur hmachhawn zawh chiaha PSG mikhual hi an ṭawngṭai chhanna chu a ni lo tawp ang - mahse Jurgen Klopp erawh a lungphang lo.

German coach chuan, "Khawvela inelna hautak ber Premier League leh Champions League-ah kan inlan a, mahse tuin nge he league pahnih khelh kawp hi duh lo ang?" a ti a, inelna sang tak an khelh dawn chuan fixture hautak chu thil chiang sa a nih thu a sawi.

Team pahnihin in anna an nei - tun season-a match an khelh tawhah an la chak dun vek. PSG-in match ruk an khelh tawhah an chak vek a, Liverpool-in match nga an khelh tawhah an chak vek bawk! A hmuhnawm dawn tih hi a hrilhfiah dan awlsam ber a ni.

PSG coach Thomas Tuchel chuan, "Kan tan chuan fiahna hautak tak a ni dawn a, mahse chu fiahna hmachhawn tur chuan kan inpeih tawh a ni," tiin Anfield-a lenglut tura a inpeih thu a sawi.

Goal khung thiam
Liverpool-in season hmasa Champions League-ah goal khung an harsat loh zia an pholang a, match 13 an khelh aṭangin goal 41 an khung - match tina 3.15 goal khung zel ang an ni!

Reds-in final an thlen laiin PSG erawh last 16-ah an zinkawng a tawp thung a, hriat tel sak atana ṭha erawh group stage-a Liverpool aia goal khung tam awmchhun chu French club hi an ni - goal 25 an khung a, Reds aiin goal hnihin an khung hnem zawk.

Liverpool-in goal khung turin Mohamed Salah, Roberto Firmino leh Sadio Mane te an la nei reng a, season hmasaa an buaina goalkeeper-ah Alisson an nei tawh bawk - season hmasa aiin an ṭha tawh zawk.

Tlarhmaa duhthlan tur lamah chuan club pahnihah thlan tur zawk an vang hle - PSG-in Neymar, Edinson Cavani leh Kylian Mbappe an nei a, khawvela eng tlarhnung mahin hmachhawn an châk lo ang!

Belchiang ila...
Tottenham Hotspur lakah Firmino a inhliam a, Brazilian forward hian inkhelh zawhah ngaihtuahawm a nih loh thu a sawi - khel thei lo pawh ni se Daniel Sturridge a la awm a, English striker hi a dam ṭhat phawt chuan goal khung thiam bik a ni.

Kum 26 mi striker hian tun season-ah goal hnih a khung tawh a, Sadio Mane chuan match ngaah goal li a khung tawh bawk. Salah-a'n goal hnih khung tawh mah se season hmasa a la phak lo tih a khelh danah a lang chiang a, PSG lakah insiamṭhat a tum ang.

Liverpool tlarhma pathum hian season hmasa Champions League-ah goal sawm ṭheuh an khung a, Europe-ah an tlangnel. PSG tan Edinson Cavani-a'n goal sarih a khung a, Neymar chuan goal ruk a khung bawk.

Tuchel-a'n Champions League a ngai pawimawh a, an league match hnuhnung berah Neymar a chawlh hahdamtir a, Mbappe chu hrem vangin a khel lo bawk. Neymar hian tun season-a inkhel bul a ṭan zawng zawngah ram leh club tan goal a la khung vek a, Mbappe-a'n match thumah goal li khungin Cavani-a'n goal hnih a khung tawh bawk.

Liverpool chungnunna?
Tlarhma leh midfield thlenga thlirin team pahnih an intluk tawk a, season hmasaa an goal khung theih dan leh duhthlan tur an neih thlirin duhthlan tur zawk an vang hle. Tlarhnung lam thlir erawhin Liverpool an chungnung zawk em, tih chu zawhna awm thei tak a ni.

PSG tan Thiago Silva hming langsar mah se kum 33 mi a nih tawh avangin tun hma a phak tawh lo a, Presnel Kimpembe leh Juan Bernat te hi han dah san viau tur atan chuan an la sit awm hret bawk. Goalkeeper tawnhriat ngah Gianluigi Buffon chu hrem vangin a inlan thei dawn lo a, si ban nghak tur Alphonse Areola hi tun hnaiah che ṭha mah se Alisson aia duhthlan tur erawh a ni lo.

Liverpool-in tun season-ah league goal hnih chiah an la chhuah a, pound maktaduai 60 chuang man Alisson , defender palian Virgil Van Dijk te an ṭangkai hle - Trent Alexander-Arnold, Joe Gomez leh Andy Robertson te hming lam hmaih a harsa.

Dejan Lovren awm loh hlanin Gomez a khel ṭha ṭhin takzet a, Arnold hi kum 19 mi lek ni mah se Champions League final a khel tawh a, World Cup semifinal thleng thei team-ah a tel bawk. Robertson hmasawnna hmuh theihin a lang a, tunah chuan Scotland captain hial a ni tawh.

Kan inpeih ang
Spurs hmachhawn zawh hnu lawka PSG hmachhawn hi thil awlsam a ni dawn lo tih a chiang a, Reds hian Southampton, Chelsea, Napoli leh Manchester City an hmachhawn chhunzawm dawn zui!

Klopp chuan, "PSG hmachhawn turin theihtawp chhuahin kan lo inbuatsaih ang. Mahse, kan hriat reng atana ṭha erawh PSG hi team ṭha tak an ni a, hmathlir thui tak nei chunga an hmalakna hi a ṭha em em a ni.

"League match hnuhnung berah an player pawimawh pahnih an chawlh hahdamtir thei bawk a ni," a ti a, PSG squad chu a chhah ṭhat avangin a harsat tur thu a sawi.

German coach chuan season hmasaa final an khelh avang maiin team ṭha zawk an ni kher lo tih sawi nghalin, "Season hmasaah final kan luh avang maiin tun season-ah champion tur angin mi tam takin min sawi a, mahse chutiang ngawta thil awlsam chu a ni lo," a ti a, an hmabak a hautak tih a hai lo.