Yezdi Bike Mizoramah a lei theih ta

Roadster, Scrambler, Adventure bike thar chu Vanlalmuana, Info Bikes chuan a khuh hawng.

Ṭhalai tam tak leh bike lam tuipuitute'n an nghahhlelh Yezdi bike pathum- Roadster, Scrambler leh Adventure-te chu nimin khan Jawa Showroom, Zarkawt, Aizawlah Vanlalmuana (Muantea), Info Bikes chuan a khuh hawng.

Bike thar khuh hawn inkhawmah Zodinpuia, Propietor, TT Motors chuan 'after sales service' chu an ngaihpawimawh thu sawiin, servicing lamah theihtawp an chhuah thu a sawi a, bike khuh hawngtu Muantea chuan Yezdi bike thar pathumte review-na hun a hmang bawk a ni.

Muantea chuan Jawa leh Yezdi lo chhuah dan tlem sawiin Mahindra & Mahindra Limited (M&M) hnuaiah nihliap khat hnuaia awm an nih thu sawiin, Yezdi awmzia tak chu 'ride' tihna a ni, a ti.

Yezdi hi rual û zawkte chuan an hmelhriat a rinawm a, hun eng emaw chen tihtawp a nih hnuah tunah hian rawn thar thawh leh a ni. Jawa nen nihliap khat hnuaia awm an nih angin parts pawh an inṭawm nasa hle tih Muantea chuan sawi bawk.

Roadster chu Retro kalpel deuh si, tunlai hmel pu deuh, cruzer rawngkai deuh a nih thu Muantea chuan a sawi a, engine RPM sang vak loah pawh khal takin a pawt thei tih a sawi a ni.

Scrambler bike a review-naah Muantea chuan Scrambler chu bike model hming ni loin bike nihna zawk a nih thu leh kawng chhiaah pawh kalpui thei tur hmel pua siam a ni, a ti. Offroad bike erawh a ni chianh lo tih sawi bawkin tyre size combination-ah pawh scrambler combination pangngai a hmang tih a sawi bawk. Twin channel ABS a nei a, ABS mode pathum a awm bakah USB charger a awm nghal a ni.

Adventure hi Royal Enfield Himalayan nena pian inang tak a ni. Muante chuan tunhmaa chhuak ṭhin Yezdi Road King nen a tanky a inang viau tih sawiin thui tak zinpui theih tura duan, petrol pawh leng hnem tak a nih thu a sawi.

Heng bike pathumte hian digital speedo an hmang vek a, Scrambler leh Roadster-te hi an speedo a inang a ni.

A rawng leh a man
Ex-Shoroom price chiah a la hriat a, Zodinpuia chuan Rs sing hnih bawr vel chu On-road price-ah chuan belh a la ngaih a rin thu Vanglaini a hrilh.

Yezdi Scrambler

Orange - Rs. 2,08,900

Yellow & Olive - Rs. 2,10,900

Dual Tone - Rs. 2,14,900

Yezdi Roadster

Dark Grey - Rs. 2,02,142

Dark Blue & Olive Green - Rs. 2,06,142

Chrome Greay & Silver - Rs. 2,10,142

Yezdi Adventure

Adv Silver - Rs. 2,13,900

Adv Black - Rs. 2,15,900

Adv Camo - Rs. 2,22,900