'Fast And Furious 10'-ah Jason Momoa

Aquaman actor Jason Momoa chu 'Fast And Furious 10'-ah a chang ve dawn.

Zirtawpni liam ta khan Fast Saga official Instagram lamah hemi chungchang hi puanzar a ni a, tunhnai lawka a nupui nena an inṭhen thu puangzartu Jason Momoa chuan Fast family a zawm ve ta tih hi an tarlang a ni.

"Fast chhungkua a len belh zel e. Kan lo lawm a che, Jason Momoa. #F10." tiin Instagram lama thefastsaga account chuan Jason Momoa thlalak post-in caption-ah an ziak. Kum 42 mi Game of Thrones star hi Fast 10 lamah chuan kan hmu ngei dawn tih a chiang ta.

Media ṭhenkhatin an tarlan dan chuan Jason Momoa hi Dominic Toretto-te hmelma lamah a chang dawn a, Charlize Theron-i 'Cipher' nen an thawkdun dawn niin an sawi a, mahse chu erawh chu thuchiang a la ni lo thung. Film siamtu lam chuan Momoa a inlan dawn tih an sawi chian bak hi chu thuchhuah dang an la nei lo.

'Fast and Furious 10' hi part pahnihah an ṭhen dawn niin an sawi a, chu chu 'The Fast Saga' hmawr an bawkna tur a nih tawh hmel bawk. Nakkum lamah hian film hmasa zawk chu tlangzarh hman an tum a, May 19, 2023-ah theatre lama en theih tura tihchhuah hman an tum. Fast family kan hmelhriat tawh sa- Michelle Rodriguez, Tyrese Gibson, Ludacris leh Sung Kang-te pawh an inlan leh ngei beisei a ni.

Hetihlai hian Luke Hobbs lema chang Dwayne 'The Rock' Johnson erawh Vin Diesel nen an inkar boruak a ṭhat loh avangin kan hmu tawh dawn lo niin a lang a, nikum December thlaah khan Fast Saga-ah a inlan tawh dawn loh thu a sawi tawh a nih kha.

Fast saga film hnuhnung ber 'F9: The Fast Saga' chu nikum June thlaah khan tlangzarh a ni a, nikum chhunga film sum lalut tam pangana a ni phak hial a ni.