‘Masters of the Universe’ Movie Netflix lamah

‘Masters of the Universe’ live action movie chu Netflix-a tihchhuah turin siam a ni dawn tih The Hollywood Reporter chuan a tarlang a, 'West Side Story' actor Kyle Allen chu He-Man lemah a chang dawn niin an sawi.

He-Man hi chu mi tam tak chuan a chanchin kan hre sa tawhin a rinawm a, tun hma deuhin Cartoon Network lama en tawh ṭhin kan ni fur mai thei. Live action movie hi kumin nipui chhung hian chan ṭan hman ngei an tum niin THR chuan a tarlang a, Nee brothers (The Lost City) chu director tur niin Shang-Chi lama a kut chhuak kan hmuh tawh David Callaham chuan script a ziak bawk ang.

‘Masters of the Universe’ hi chu fahrah pakhat Adam, a hnua lal fapa a ni tih inhrechhuak leh misual bawraw tak Skeletor laka a ram mite chhanchhuak tura a pen chhuah dan chanchin a ni.

1980's chho vel khan animated series chu tihchhuah daih tawh niin kum 1987-ah khan live-action film Dolph Lundgren channa chu tihchhuah a lo ni tawh. Tuna an siam thar leh tur hi a tirah chuan Sony hnuaiah hmalak a ni phawt a, mahse tunah hian Netflix lamah hian hma lak a ni leh ta zawk a ni. Hetihlai hian China lamah chuan Sony hnuaiah tihchhuah a ni thung ang.

Netflix lamah hian tunah hian 2D animated series 'Masters of the Universe: Revelation' tihchhuah a ni tawh a, CG-animated series 'He-Man and the Masters of the Universe' pawh season hnihna tihchhuah leh thuai an tum bawk.