NASA-in vur chet dan zirna tur satellite ICESat-2 hlawhtling takin kap chhuak

National Aeronautics and Space Administration (NASA) chuan khaw­muala vur chet dan zir chianna tur satellite chu kar kalta Inrinni khan hlawhtling takin a kap chhuak ta.

Satellite-2 (ICESat-2) an tih tih hi California aṭangin zing lam dar 9.02-ah kahchhuah a ni a, harsatna awm loin an tum an tihlawhtling thei a ni. He satellite hian khawmuala vur tawlh leh chet dan a thlitlai dawn a, chhum chet vel dan pawh a hriat zung zung theih dawn a ni.

ICESat-2 hian scien­tist te chu planet-a vur tawlh leh a tui ral chak dan zirna kawngah nasa takin a pui thei dawn a, polar area-a vur chhaH zawng pawh a hriat theih dawn a ni. Hetiang a nih chuan Greenland leh Antarctica vela vur chet dan pawh kim chang zawkin a hriat theih dawn tihna a ni.

Sik leh sa inthlak thleng nasa tak avangin khaw­muala vur te chu a tuiral nasa hle a, chu chuan tuipui chim chin pawh a tihsan phah a ni. Hei hi mi­thiam te chuan a la pawi thei dawn hle niin an sawi a, vur chet dan zir chian pawh hi mut mawh hnar mawha an neih mek a ni.

Greenland leh Antar­ctica-a vur tui ringawt pawh hian kum khatah millimeter khat chuanga sea level a tihsan phah avangin a ngaimawh awm hle a, scientist te lu tihaitu a ni mek. NASA chuan ICESat-2 hian hemi venna kawngah hian nasa taka a puih theih an beisei a, Hubble Space Telescope pawhin hemi kawngah hian beihpui an thlak mek bawk.