Pangzawl tlangval Jonathan-a'n Mizo Idol a mangṭha ta

Thawhlehni zan khan top 5 intihsiak result puan a ni a, Pangzawl tlangval Jonathan Laleng­zauva chu top 4-ah a inhlang­kai zo ta lo.

Jonathana hian a Idol zinkawng chu zawh tawp tawh mah se, a zai ngainatute tan kumin chhung ngeia music video chhawpchhuah sak a tum thu a sawi.

Zinkawng ngaihnawm chu...
A tum ber Mizo Idol lal ṭhutthleng luah phak lo mah se, top 5 a thleng a, hlawhtlinna ropui tak a ni. He dinhmun thleng tur hian nasa takin a bei a, tunah chuan Zoram mipuiin a zaithiam zia an hre tawh a ni.

Jonathan-a hi kum 10 mi lek a nih aṭanga zai ṭan a ni a, intihsiak hrang hrangah pawh a lo inlan fo tawh. Khawtlang leh kohhran thil tihah a zai nasa hle a, Pangzawl leh a chehvelah chuan hriat a hlawh hle.

Lunglei-a 'Zo-Star' thlannaah khan a lo inlan tawh a, Zoram pum huap Youth Icon leh Mizo Idol thlanna-ah a lo tel tawh bawk. Mizo Idol hnuhnung ber 2015-ah khan inlanin second round a lut. Mahse a tum ram thleng phak loin a tla zui a, hriatzui pawh a hlawh lem lo. LPS buatsaih Youth Icon hnuhnung berah khan a tel bawk a, dinhmun sang a thleng phak lo.

Engtin zel...?
A lo hlawhchham tawhna te hi mi tam tak tan chuan zai chawlhsanna tham hial a ni ngei ang! Mahse beidawng duh loin Zonet Chhungkua-te'n Mizo Idol Season 6 an buatsaihah a tel leh ngat a, Zoram mipuiin tunge a nih an hre chiang ta a ni.

Tun ṭum Mizo Idol-ah hian Lunglei Audition aṭangin a zin­kawng a ṭan a, top 5-ah a hmawr a bawk ta a ni. Mipuiin a zai ngaihno bei tak ngaithlak an chak a, social media lam thlenga thawm nei lian ber te zinga mi a ni.

Jonathan-a hian 'Leikapui Style' a larpui a, mite hriat a hlawh reng tawh ang. Mizo rilrem zawng tak 'Phengphe khua a tlai zo ta' tih leh CFL Hming­thanga hla 'Lehkhathawn' tih hla a sak te chu nakin thlenga ngaithlak nawn fo tlak a ni.

Music video lam hi...
Jonathana hian rimawi khaw­velah a sang thei ang ber thlen a duh a, Mizo Idol hi a bulṭan­na chauh a music video siam lam a rilruk a ni. Jonathana chuan, "Kumin chhung ngeiin music video tihchhuah hman ka tum a, hma pawh kan la nghal dawn a ni. Hmun hrang hrangah ka zai ngainatu mi tam tak an awm tih hriat hi a nuam a, an tan hla mawi tak tak chawpchhuahsak zel ka tum a ni," tiin Vanglaini a hrilh.

Lawmthu a sawi
Pangzawl tlangval Jonathana chuan Zoram mipui hriata phochuaktu Zonet Chhungkaw chungah lawmthu a sawi a, ṭhalaite hmakhua ngaia an hmalakna leh inpekna chu ropui a ti hle. Hmun hrang hranga amah lo ṭantute chungah lawmthu a sawi bawk a, amah duhsak­tute leh thilpek petute hnenah lawm­­thu a sawi tak meuh a ni.

Jonathan Lalengzauva hian Mizo Idol kaltlangin a theihna a phochhuak tawh a, a aw mawi tak hmangin Zoram mipuite min awih zel a tum a ni.