Mizoram International Short Film Festival ṭan a ni dawn ta

20th September, 2018

Mizoram sorkar hnuaia Department of Information & Public Relations, Innovations India (P) Ltd. leh Mizoram Film Forum (MFF) ṭangkawp ten an buatsaih Mizoram International Short Film Festival 2018 chu vawiin tlai dar 5 hian Aijal Club-ah ṭan a ni dawn ta.

He film festival-a hian short film intihsiakah film 82 zet a lut a, heng zinga 57 hi Mizoram pawn aṭanga lut a ni. Naktuk aṭangin a duh apiang tan chhim theih a ni.

Vawiin tlaia Aijal Club-a Mizoram International Short Film Festival hawnna hun hmang tur hian Bollywood super star Gulshan Grover a lo kal dawn. Naktuk lamah 'Oh My God' film siamtu Umesh Sukhla chuan Mizo filmmaker te zirtirna a pe dawn bawk a ni.

A thlawnin...

MISFF hi a duh a piang tan Aijal Club-ah chhim theih a ni dawn a, naktuk nileng hian chhuah a ni ang.

Short film chhuah tur te hi a tam zawk chu State pawn aṭanga lo lut niin, 57 zet a tling. Chung zinga 15 chu foreign film siam a la ni cheu bawk a, Mizo kutchhuak short film pawh 25 a awm bawk.

Aijal Club-ah chawhma dar 10:00 aṭanga tlai dar 3:00 thlengin film hmuhnawm tak tak en tur a awm dawn a ni. Indian film director lar Umesh Shukla chuan tlai dar 3:30-4:30 inkarah Mizo film-maker te tan workshop a buatsaih dawn bawk a ni.

'Bad Man' chu...

Bollywood star Gulshan Grover chuan he festival hi a hmanpui dawn a, a film thar ber 'FORBIDDEN' film chu en tur a awm dawn bawk. 'FORBIDDEN' film hi India ramah tlangzarh a la ni lo a, Mizo mipuiin kan en hmasa ber dawn tihna a ni.

Kum 62 mi Gulshan Grover hian film 400 chuang zet a chang tawh a, Boollywood khawvelah chuan 'Bad Man' tia hriat lar a ni.

A vawi hnih nan Umesh Shukla

Indian film industry-a hriat hlawh tak Umesh Shukla chu a vawi hnih nan Aizawl-ah a lo kal dawn. Ani hi he film festival hlutna belhchhahtu tur a ni a, a thiamna leh theihna te Mizo te ban phakahah a awm dawn. Ani hian zirtirna a pe dawn a, film siam lama tui mite tan chuah hmaih phal chi a ni lo vang.

Actor ni bawk Umesh Shukla hian film eng emaw zat a lo chang tawh bawk a ni.