VOLTAS MALSAWM HOUSE ṬHAZUAL LENGZEM ; Latei Hringngen 'A ṭha vek e' a ṭha ber e

Voltas Malsawm House Ṭhazual Lengzem chart-ah tunlai lengzem singer zinga mi lawm hlawh ber zinga mi Latei Hringngen chu pakhatna a ni a, a hla hit 'A ṭha vek e' chu pakhatna a ni.

'A ṭha vek e' a ṭha ber
Latei Hringngen-in chart topper a rawn nihpui hla 'A ṭha vek e' hi ama phuah ngei a ni nghe nghe a, hla mawi tak leh ngaihthlak hahdam tak a ni.

He hla hi Latei hian nikum October thla tawp lamah khan a tichhuak a, Thla thum chhung vel lekin YouTube-ah thlirtu nuai 9.5 chuang a nei der tawh. A hla a mawi a, a sa mawi a, music video hmuh a nuam a, YouTube lama stream a hlawh tam dan aṭangin Zofate'n mawi kan titlang tih a hriat bawk a, pakhatna a ni pawh hi a phu hle.

'Lungrunpui' hmanga thiam taka Zofate min awitu Latei hi chart hmasa lamah khan pathumna a ni a, tunah erawh pakhatna a rawn ni ta. 'A ṭha vek e' hi chart-a a lanpuina a rei tawh a, tunah phei chuan dinhmun ṭha berah a rawn dinpui ta a ni.

Pahnihna leh pathumna chu
Marina V Varte 'Aw Valmawi' chu pahnihna a ni. Marina-i hian folk song lam hun eng emaw chen a hawi hnuah lengzem hla mawi tak mai 'Aw Valmawi' a rawn tichhuak a, chart hmasa lamah khan palina ni mah se tunah chuan pahnihna a rawn ni der mai.

Pathumna chu Mizo rock band ṭha ber zinga mi Mood Station 'Suangtuah hmun' a ni. He hla hi nikum November thlatir lama an tihchhuah kha a ni a, a mawi bawka a dinhmun a ṭha chak viau mai.

Chart-a lang hla dangte chu
PC Lalnunpuii 'Ka leng zo lo' chu palinaah a rawn inhlangkai ve ta a, Pca & Rka-te chuan 'Hmangaih LM' mawi taka an cover chu top 5-ah an rawn inhlankaipui ve bawk.

Lilzo & David Mawia Chhakchhuak 'Ka kal a hun tawh' chu parukna niin, HT Lalthanzami, Vri Pautu, Puipuia & Zomuanpuia-te bakah Elena HT Par-te chu top 10-ah an lang ve bawk a ni.

Ṭhazual Lengzem top 10:-
1 Latei Hringngen A ṭha vek e
2 Marina V Varte Aw Valmawi
3 Mood Station Suangtuah hmun
4 PC Lalnunpuii Ka leng zo lo
5 Pca & Rka Hmangaih LM
6 Lilzo & Ka kal a hun tawh
David Mawia Chhakchhuak
7 HT Lalthanzami Thinlung kawltu
8 Vri Pautu Chunchawi hrai leng
9 Puipuia & Zomuanpuia NorthEast 8 Sisters
10 Elena HT Par Kha ni kha