Zaninah mi pakhat thlahliam a ni dawn ; Mizo Idol tur chinfel zan!

Mizo Idol Season 6 chu a hmawr bawk a hnai chho zel a, zan­in hian intihsiak bik chu zawh fel a ni tawh dawn. Zanin hian mi pali zinga pakhat a tla ve leh ang a, top 3 te chu hla hnih hmangin Mizo Idol nih tumin an intihsiak dawn a ni.

Zan pawimawh bik
Contestant te tan zanina intih­siak neih leh tur hi a pawimawh hle dawn a, Mizo Idol nih leh nih loh hriltu a ni tawh dawn a ni. Karleh Thawhlehni zan leh Zirtawpni zanah show hi a awm leh dawn a, intihsiak erawh a awm tawh dawn lo thung. Thawh­lehni zanah Grand Finale show pui tham tak buatsaih a ni ang a, Zirtawpni zanah Mizo Idol final result puan a ni ang. Grand Finale show hi zan hnih a awm dawn tihna a ni a, intihsiak tawh loin contestant te an inlan thei dawn a ni.

Hla hnih = Mizo Idol
Zanin hian top 3 ten an hla duh pahnih ṭheuh an sa ang a, chu chu Mizo Idol nihna leh nih lohna hrilhtu a ni tawh ang. Hla thlan thiam a pawimawh dawn hle a, tih fuh chuan hla hnih hmangin Mizo Idol a nih theih dawn a ni.

Mahni hla duh tak mai hmanga Idol nih chu thil chakawm tak tur a ni a, chetsual palh hlauh erawh chuan insiam ṭhatna hun a awm tawh dawn lo! Top 3 intihsiak a pawimawh takzet dawn a, a ngaihnawm leh hle dawn a ni.

Tunge khan?
Social media lamah chuan Mizo Idol tur an in rinsiak laih laih tawh hlawm a, tu tute emaw chuan an ring dik nawk dawn. Chhinga Veng-in Ticos Darhmingthanga an kawl avangin an zam hauh lo vang a, Chanmari mipuiin Jer­ry Lalrinawma chungah rinna an nghat ngam bawk ang. Zemabawk leh Suangpuilawn mipui innghahna Immanuel Lalawmpuii lakah beiseina a sang a, H. Lalnunsiami pawh Champhai mipuiin ropui tak lo hmuh an duh ngei ang.

Heng mi pali te hi top 4 intih­siakah khan an che ṭha vek a, tu ber nge tla ang tih pawh rinthiam harsa tak a ni. Endiktute tan pawh a hrilhhai thlak viauin a rinawm a, thutlukna siam harsa tur tak a ni.

Chutih rual chuan judge-te'n thutlukna huaisen leh dik an lo siam fo tawh a, a hrechiangtute chu mipui an ni. An thutlukna siam a sual loh zia a lang chho zel a, top 4 aṭang pawhin tla awm ber an thur chhuak leh nalh dawn a ni.

An zing aṭang hian tute pawh hi tling/tla pawh nise Mizo Idol tihlutute vek an ni tawh a, Mizo mipui hriatzui an hlawh tawh dawn tho tho a ni.

Teawmi a dam!
Thawhlehni zana top 4 in­tih­siakah Zemabawk nula Imma­nuel Lalawmpuii a zai hmasa ber a, taksa lama harsatna nei lo ang maiin a zai chhuak ṭha. A zai zawhah erawh host - Zonuni ban vuan chungin a ding ṭawk ṭawk a, show zawh hmain hospital panpui a ngai hial a nih kha.

Teawmi hi a taksa a chau a, luhai avangin a talbuai ta a ni. A hrawk lamah harsatna a nei bawk a, ngaihtuahawm lutuk erawh a ni lo. Hospital aṭang hian show neih zan la la khan a chhuak leh nghal a, social media lama zai nghal a nih thu darh chiam kha thubelh chian dawl lo a ni.

'Dolma' hitmaker Teawmi hian nimin aṭang khan inbuat­saihna pawh a nei leh thei tawh a, zaninah a inlan thei dawn a ni.

Mizo Idol - Chhantea a zai dawn
Sumsuih tlangval H. Lal­chhan­chhuaha (Chhantea), Mizo Idol 2009 chu zanin hian a zai dawn a, show en tichakawm zualtu a ni ngei ang. Chhantea zai thiam zia sawi nan a ngai lo a, a zai ngaithla turin TV hmaah ṭhut mai tur a ni.

Ani bakah hian 'Hey' tih hla hmanga Zoram mipui lo awi tawh leh Mizo Idol-a hnuhma ṭha­tak lo hnutchhiah tawh Essy chu a zai dawn a, Manipur aṭangin Lalengmawii Sinate chu chah thlen a ni tawh bawk.

Show hi zan dar 8:00-ah ṭan a ni leh dawn a, Zonet Zawlbuk leh HD-ah te live-a pekchhuah a ni ang a, YouTube-ah erawh live-a tihchhuah a ni tawh rih dawn lo.