MISFF hawn a ni ta ; Vawiin nilengin film en tur awm dawn

Mizoram International Short Film Festival chu nimin tlai khan Chief Minister Lal Thanhawla'n a hawng ta a, vawiin nilengin a thlawnin short film en tur a awm zui dawn a ni.

Mizoramin a vawikhat nan International Short Film Fes­tival a thleng a, he hun hi film siam lama tui mite tan chuan bawlhbelh chi a ni lo. Short film ṭha tak tak 82 zet chhuah a ni dawn a, a tam zawk hi chu state pawn leh foreign te a ni hlawm a, Mizo kutchhuak film 25 lai entur a awm dawn bawk a ni.

He hun hi Bolly­wood-a hriat hlawh tak Gulshan Grover leh Umesh Shukla te chuan an hmanpui dawn a ni. Gulshan Grover film thar ber 'Forbidden' chu a hmasa ber atan chhuah a ni dawn a, en chakawm tawh tak a ni.

Chawhma dar 10:00 aṭanga tlai dar 3:00 thlengin film hmuhnawm tak tak en tur a awm dawn a, Indian film director lar Umesh Shukla chuan tlai dar 3:30 - 4:30 inkarah Mizo film-maker te tan workshop a buatsaih dawn bawk a ni.

MISFF hi a duh apiang tan chhim theih niin, film siam lama tui mite tan phei chuan tel ngei ngeina chi a ni.